ԵՐԵՎԱՆ, 5 ՓԵՏՐՎԱՐԻ, ԱՐՄԵՆՊՐԵՍ: Ազգային ժողովի ՕԵԿ խմբակցությունը Պետաիրավական հարցերի մշտական հանձնաժողովում Մարդու իրավունքների պաշտպանի պաշտոնում կպաշտպանի պատգամավոր Զարուհի Փոտանջյանի թեկնածությունը: Այս մասին ԱԺ ճեպազրույցների ժամանակ հայտնեց ՕԵԿ խմբակցության պատգամավոր Հովհաննես Մարգարյանը: «Մենք քննարկել ենք հարցը, խոսել ենք նաև տիկին Փոստանջյանի հետ: Մեր խմբակցությունը որոշում է կայացրել, որ հանձնաժողովում առաջարկելու և պաշտպանելու ենք Զարուհի Փոստաջյանի թեկնածությունը»,-«Արմենպրես»-ի փոխանցմամբ` ասաց պատգամավորը: Նրա խոսքով` Զարուհի Փոստանջյանը սկզբունքային քաղաքական գործիչ է, բացի այդ` կին է, իսկ դրանով լուծում կտրվի գենդերային հարցերի: 

ՕԵԿ խմբակցության քարտուղար Մհեր Շահգելդյանն էլ ընդգծեց, որ Փոստանջյանը երկար տարիներ աշխատանք է տանում մարդու իրավունքների պաշտպանության ոլորտում` համագործակցելով քաղաքացիական հասարակության հետ:

ԲՀԿ խմբակցության ղեկավար Նաիրա Զոհրաբյանը հայտնեց, որ իրենք առաջադրելու են ՄԻՊ-ի իրենց թեկնածուին: «Երեկ խմբակցությունում մենք քննարկել ենք հարցը ու որոշել առաջադրել Մակար Եղիազարյանի թեկնածությունը: Միգուցե նրա անունը ձեզ շատ բան չի ասում, բայց նա շատ պրոֆսիոնալ երիտասարդ է, ով միջազգային կառույցներում աշխատելու փորձ ունի: Նրանք են, որ կարող են հավուր պատշաճի իրականացնել մեր երկրի գլխավոր իրավապաշտպանի գործունեությունը»,-ասաց Նաիրա Զոհրաբյանը:

Հարցին ի պատասխան, թե ինչու չեն պաշտպանում Զարուհի Փոստանջյանի թեկնածությունը` ԲՀԿ-ական պատգամավորը ներկայացրեց իր անձնական մոտեցումը: «ՄԻՊ-ը պետք է լինի հնարավորինս անաչառ: Հարգելով Զարուհի Փոստանջյանի սկզբունքայնությունը` այնուամենայնիվ, կարծում եմ, որ Մարդու իրավունքների պաշտպանը չպետք է լինի խիստ ընդգծված արմատական գործիչ և ոչ էլ ընդգված իշխանական գործիչ»,-նշեց Զոհրաբյանը` հավելելով, որ քաղաքականացված անձը չպետք է լինի այդ պաշտոնում:

ՀՅԴ-ական Աղվան Վարդանյանն էլ հայտնեց, որ ինքը Փոստանջյանին անձամբ խոստացել է քվեարկել նրա օգտին, եթե նա լինի թեկնածուների շարքում:

ՀԱԿ խմբակցության ղեկավար Լևոն Զուրաբյանը նկատեց, որ ինքը կողմ է ՄԻՊ-ի պաշտոնում տեսնել Զարուհի Փոստանջյանին, բայց դեռ չեն որոշել մասնակցելու են քվեարկությանը, թե ոչ:

ԱԺ պետաիրավական հարցերի մշտական հանձնաժողովի անդամները ՄԻՊ-ի իրենց թեկնածուների մասին դիմումները հանձնաժողով պետք է ներկայացնեն մինչև փետրվարի 9-ը: