ԵՐԵՎԱՆ, 26 ՆՈՅԵՄԲԵՐԻ, ԱՐՄԵՆՊՐԵՍ: Հայաստանը ժողովրդավարական երկիր է,  և յուրաքանչյուր ոք իրավունք ունի օրենքի շրջանակներում իրականացնել քաղաքական ակցիա: Այս մասին ՀՀԿ ԳՄ նիստից հետո լրագրողների հետ զրույցում ասաց ՀՀ ԱԺ փոխնախագահ Հերմինե Նաղդալյանը՝ պատասխանելով դիտարկմանը, թե դեկտեմբերի 1-ից «Նոր Հայաստան» նախաձեռնությունը հանրահավաք է հրավիրել և պատրաստվում է քաղաքացիական անհնազանդության: «Մենք կարծում ենք, որ սահմանադրական բարեփոխումների գործընթացին մասնակից բոլոր քաղաքական ուժերը մնալու են օրենքի շրջանակներում, և չեն լինելու ուժեր, որոնք փորձելու են շրջանցել օրենքը»,- «Արմենպրես»-ի հաղորդմամբ՝ ընդգծեց ԱԺ փոխնախագահը:

Նաղդալյանը նշեց, որ սահմանադրական բարեփոխումների հանրաքվեն պետք է լինի հնարավորինս օրինակելի, թափանցիկ և արդար: «Մենք համոզված ենք, որ արդյունքում մենք ունենալու ենք լեգիտիմ արդյունք և օրինակելի հանրաքվե, և որևէ այլ զարգացումներ, գոնե մեր կողմից, տեղի չեն ունենա»,- հավելեց ԱԺ փոխնախագահը:

Անդրադառնալով քարոզարշավի ընթացքին՝ Նաղդալյանը նկատեց, որ այն բավականին ակտիվ է, ինչի շնորհիվ ավելի շատ քաղաքացիներ են իրազեկվում սահմանադրական բարեփոխումների գործընթացի մասին:

Հարցին՝ «այո»-ի կողմնակիցներն են շատ, թե «ոչ»-ի, Նաղդալյանը պատասխանեց, որ այս պահին դրա որոշելու ժամանակը չէ՝ նկատելով, որ դա ցույց կտա միայն հանրաքվեն: Նա հերքեց ընդդիմադիրների պնդումները, թե ՀՀԿ-ն հանրությունից թաքցնում է սոցիոլոգիական հարցումների արդյունքները, որոնք ցույց են տալիս, որ Հայաստանում բնակչության 75 տոկոսը դեմ է բարեփոխումներին: «Մեր մեր հանրությունից թաքցնելու որևէ բան չունենք և նման ցանկություն էլ չունենք»,- եզրափակեց Նաղդալյանը: