Հովհաննես Զանազանյանը խորհրդանշում էր մեր ֆուտբոլի ոսկյա ժամանակները. ԱԺ նախագահ
ԵՐԵՎԱՆ, 5 ՀՈԿՏԵՄԲԵՐԻ, ԱՐՄԵՆՊՐԵՍ: ՀՀ ԱԺ նախագահ Գալուստ Սահակյանը ցավակցել է Հովհաննես Զանազանյանի մահվան կապակցությամբ: Ինչպես «Արմենպրես»-ին տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, ԱԺ նախագահի ցավակցական ուղերձում ասվում է.
«Խոր ցավով տեղեկացա հայկական ֆուտբոլի լեգենդներից մեկի՝ Երեւանի «Արարատ»-ի երկարամյա ավագ Հովհաննես Զանազանյանի մահվան մասին:
Նրա մահով կորցրինք մեր ֆուտբոլի եւ մասնավորապես «Արարատ 73»-ի ամենախարիզմատիկ, տաղանդավոր եւ հարգանք վայելող դեմքերից մեկին, ով հայկական ֆուտբոլի չխամրող եւ հպարտություն պարգեւող էջերի տարեգիրներից մեկն էր:
Հովհաննես Զանազանյանը խորհրդանշում էր հայրենական սպորտի հաջողությունն ու մեր ֆուտբոլի ոսկյա ժամանակները, որոնք դրական էներգիա էին տալիս տարբեր տարիքի մարզասերների:
Խորապես ցավակցում եմ Հովհաննես Զանազանյանի հարազատներին, մերձավորներին, նրա ֆուտբոլային տաղանդի երկրպագուներին եւ կիսում բոլորի վիշտը»:
Բաժանորդագրվեք մեր ալիքին Telegram-ում