Թուրքիայում անչափահասի զոհվելու աղմկահարույց գործը քննած դատախազը պատանդ է վերցվել
ԵՐԵՎԱՆ, 31 ՄԱՐՏԻ, ԱՐՄԵՆՊՐԵՍ: Թուրքական ձախ արմատական խմբավորումը (անվանունը չի հրապարակվում) պատանդ է վերցրել 2013 թվականին Ստամբուլում փողոցային բողոքի ակցիաներում 15-ամյա անչափահաս Բերքին Էլվանի զոհվելու աղմկահարույց գործը քննած դատախազ Մեհմեթ Սելիմ Քիրազին:
Ինչպես հաղորդում է «Արմենպրես»-ը` վկայակոչելով թուրքական «Հուրիեթ» թերթը, զինված մարդիկ դատախազին պատանդ են վերցրել իր գրասենյակում եւ պահանջում են ձերբակալել անչափահասի զոհվելու մեջ մեղավոր ոստիկաններին:
Ոստիկանությունը շրջափակել է դատախազության շենքը: Դատախազի գրասենյակը գտնվում է շենքի 6-րդ հարկում: Բոլոր աշխատակիցները տարհանվել են շենքից:
Դատախազությունը ԶԼՄ-ներին հայտնել է, որ արդեն կապ են հաստատել պատանդառուների հետ, ովքեր համացանցով տեղեկացրել են Քիրազին ազատ արձակելու նախապայմանները: Հարցով զբաղվում են Թուրքիայի հատուկ ծառայությունները:
Բերքին Էլվանը Ստամբուլի կենտրոնի Գեզի այգում բողոքի զանգվածային ակցիայի ժամանակ մնացել էր ոստիկանության նետած գազային նռնակների տարափի տակլ: Նա գազային նռնակի պայթյունից հայտնվել էր կոմայի մեջ եւ հիվանդանոցում մահացել ամիսներ անց: Երեխայի մայրը պատմել էր, որ նա տնից դուրս էր եկել խանութից հաց գնելու համար:
Լուսանկարը` «Հուրիեթ»-ի
Բաժանորդագրվեք մեր ալիքին Telegram-ում