ԵՄ-ն ցանկանում է խորացնել համագործակցությունը Հայաստանի հետ
ԵՐԵՎԱՆ, 19 ՄԱՐՏԻ, ԱՐՄԵՆՊՐԵՍ: Եվրամիությունը ցանկանում է խորացնել համագործակցությունը Հայաստանի հետ, գտնել երկկողմ հետաքրքրություններ, որտեղ հնարավոր է առավել խորացնել համագործակցությունը: Այս մասին ԵՄ-Հայաստան խորհրդարանական համագործակցության հանձնաժողովի 15-րդ նիստի ընթացքում նշեց ԵՄ Եվրոպական արտաքին գործերի ծառայության վարչության պետի տեղակալ Ադրիանո Մարտինսը: Նա կարևորեց այն հանգամանքը, որ հանձնաժողովի նիստը անցկացվում է այն պահին, երբ Հայաստանն ու Եվրամիությունը փորձում են հստակեցնել հետագա համագործակցության եղանակները: «Այժմ Եվրամիությունը վերանայում է ԵՄ Հարևանության քաղաքականության ծրագիրը, ինչը բնականոն գործընթաց է այն դեպքում, երբ այդ ծրագիրն արդեն մի քանի տարի գործում է: Հիմա մենք պետք է հասկանանք, թե ինչպես կարելի է ավելի լավ իրականացնել այդ քաղաքականությունը»,- «Արմենպրես»-ի հաղորդմամբ՝ նշեց նա:
Մարտինսը կարևորեց նաև այն հանգամանքը, որ Արևելյան գործընկերության 6 երկրների նկատմամբ պետք է տարբեր մոտեցումներ ցուցաբերվեն: Նա շեշտեց, որ ԵՄ-ն նախկինում էլ տարբերակում է դրել Արևելյան գործընկերության անդամ երկրների միջև, սակայն պետք է իրականացվի գոյություն ունեցող տարբերկման հստակեցում, որում հաշվի են առնվելու անցյալի դասերը և գործընկեր երկրների առաջարկները և տեսակետները:
Բաժանորդագրվեք մեր ալիքին Telegram-ում