ԵՏՄ-ին Հայաստանի անդամակցությունը նախորդ տարեվերջին ցանկալի է համարվել հայաստանաբնակների կողմից
ԵՐԵՎԱՆ, 2 ՄԱՐՏԻ, ԱՐՄԵՆՊՐԵՍ: Եվրասիական տնտեսական միությանը Հայաստանի անդամակցությունը սոցիոլոգիական հարցմանը մասնակցած ՀՀ քաղաքացիների մեծամասնությունը ցանկալի է համարել:
«Արմենպրես»-ի հաղորդմամբ` այս մասին լրագրողների հետ հանդիպման ժամանակ տեղեկացրեց Գելլափ Ինթերնեյշնլ Ասոցիացիայի հայաստանյան ներկայացուցչության տնօրեն Արամ Նավասարդյանը:
«2014 թվականի հոկտեմբերին Բելառուսի մայրաքաղաք Մինսկում ստորագրվել է Եվրասիական տնտեսական միությանը միանալու պայմանագիրը, արդյո՞ք կարծում եք, որ Հայաստանի ընդգրկումը այդ միությանը ցանկալի էր» հարցին` հարցվածների 11 տոկոսը պատասխանել է «Միանշանակ այո», 53 տոկոսը` «Ավելի շուտ այո», ստացվում է, որ 64 տոկոսը դրական է վերաբերվում ԵՏՄ-ին անդամակցությանը:
Արամ Նավասարդյանի խոսքով` հետազոտության արդյունքներն այս մասով համընկնում են իրենց նախկին հետազոտությունների տվյալների հետ:
Արևմուտքի կողմից ռուսական պատժամիջոցների և նավթի գների անկման պատճառով վերջին երեք շաբաթների ընթացքում ռուսական ռուբլին արժեզկվել է, ինչպե՞ս այն կանդրադառնա ձեր ընտանիքի և Հայաստանի տնտեսական վիճակի վրա» հարցին էլ` հարցվածների մեծամասնությունը մատնանշել է բասացական ազդեցության հավանականությունը: Մասնավորապես, 45 տոկոսը նշել է, որ «Շատ վատ կանդրադառնա», 21 տոկոսը` «Ավելի շուտ վատ կանդրադառնա», այսինքն` 66 տոկոսը վատ փոփոխություններ է ակնկալել: ՀՀ տնտեսության վրա ազդեցությունը հարցվողներն ավելի շատ են կանխատեսել` 88 տոկոսը նշել է, որ վատ կանդրադառնա ռուբլու արժեզրկումը ՀՀ տնտեսության վրա:
Նոյեմբերի 20-27-ին Գելլափ Ինթերնեյշնլ Ասոցիացիայի հայաստանյան ներկայացուցչությունն իրականացրել է հետազոտություն ողջ Հայաստանում` 1067 մարդու շրջանում, կատարվել է դեմ առ դեմ հարցում:
Բաժանորդագրվեք մեր ալիքին Telegram-ում