Պատարագ Մրգավանում` Ավետիսյանների հոգու հանգստության համար
ԱՐՏԱՇԱՏ, 26 ՀՈՒՆՎԱՐԻ, ԱՐՄԵՆՊՐԵՍ: Արարատի մարզի Մրգավան համայնքի Սուրբ Հակոբ եկեղեցում հունվարի 25-ին Տեր Մխիթար քահանա Ալոյանը պատարագ մատուցեց` Ավետիսյանների ընտանիքի հոգու հանգստության համար: Պատարագիչ քահանան խնկարկեց անմեղ զոհերի հիշատակը: Տեր Մխիթար քահանա Ալոյանն իր խոսքում մեջ բերեց աստվածաշնչյան «Մի սպանաներ» պատվիրանը եւ ներկաներին հորդորեց ապրել աստվածաշնչյան պատգամներով , որպեսզի չարժանանանք Աստծո բարկությանը: «Հոգին Աստծո կողմից մարդուն տրված պարգեւ է, որը իրավասու է վերցնել միայն Բարձրյալը»,- նշեց նա: Տեր Մխիթարը ստահակի արարքը համեմատեց առաջին մարդասպան Կայենի արարքի հետ: Նա ասաց, որ այդ ստահակը եղբայրասպան է, եւ մենք պետք է մեկի արարքով չչափենք մեր բարեկամ ռուս ժողովրդին: Եվ նորից ու նորից խաղաղություն կամեցավ Ավետիսյանների գերդաստանի նահատակների հոգուն, միաժամանակ խաղաղություն խնդրեց Աստծուց` Հարավի, Հյուսիսի, Արեւելքի եւ Արեւմուտքի ժողովուրդների համար:
Պատարագին մասնակցում էին Արարատի մարզպետ Ռուբիկ Աբրահամյանը, մարզպետարանի աշխատակազմի մշակույթի եւ սպորտի բաժնի գլխավոր մասնագետ Սեյրան Նազարյանը, սոցապահովության բաժնի պետ Գեղամ Միրզոյանը, ֆինանսական եւ սոցիալ-տնտեսական զարգացման վարչության պետ Գուրգեն Եղիազարյանը, այլ պաշտոնատար անձինք: Պատարագին ներկա էին նաեւ հավատացյալներ Բուրաստան, Բերքանուշ համայնքներից:
Լիլիթ Մաճկալյան
Բաժանորդագրվեք մեր ալիքին Telegram-ում