Ոստիկանությունն անցնում է նոր համազգեստի
ԵՐԵՎԱՆ, 17 ՍԵՊՏԵՄԲԵՐԻ, ԱՐՄԵՆՊՐԵՍ: ՀՀ ոստիկանության պետ Վլադիմիր Գասպարյանը սեպտեմբերի 17-ին ոստիկանության Երևան քաղաքի վարչության կայազորի ստորաբաժանումների ստուգատես է անցկացրել մայրաքաղաքի պարեկապահակետային գնդի վարժահրապարակում: Ինչպես «Արմենպրես»-ին տեղեկացրին Ոստիկանության մամուլի ծառայությունից` Գասպարյանը կարևորել է ծառայողների՝ նոր համազգեստի անցնելու անհրաժեշտությունը` որպես համակարգում շարունակվող բարեփոխումների էական բաղադրիչ:
Ստուգատեսի ընթացքում ոստիկանության պետը ստուգել է ծառայողների նոր համազգեստները, դիտողություններ արել հայտնաբերված թերությունների վերաբերյալ, պահանջել վերջնական տեսքի բերել համազգեստները և գործընթացի պատասխանատուների հետ քննարկել թերացումները շուտափույթ վերացնելու միջոցները:
Վլադիմիր Գասպարյանը նաև շնորհակալություն է հայտնել դրական արդյունքի համար և հիշեցրել, որ ոստիկանության ղեկավարությունը վճռական է համակարգի բարեփոխումները շարունակելու գործում:
Ստուգատեսի ավարտին տրվել են համապատասխան ցուցումներ ու հանձնարարականներ:
Բաժանորդագրվեք մեր ալիքին Telegram-ում