Պարը համախմբել էր յոթ գյուղերի փոքրիկներին
ԳՅՈՒՄՐԻ, 1 ՍԵՊՏԵՄԲԵՐԻ, ԱՐՄԵՆՊՐԵՍ: Պարի հանդեպ սերը համախմբել էր Արթիկի տարածաշրջանի յոթ գյուղերի փոքրիկ պարողներին: «Արմինա» պարային ստուդիայի նախաձեռնությամբ օգոստոսի 31-ին Հառիճի վանական համալիրի տարածքում տեղի ունեցավ բարեգործական համերգ՝ նվիրված Գիտելիքի օրվան: Համերգի ընթացքում պարային տարբեր ոճերով հանդես եկան ստուդիային կից խմբերի 4-14 տարեկան երեխաները:
Ինչպես «Արմենպրես»-ին տեղեկացրեց նախաձեռնության հեղինակ «Արմինա» պարային ստուդիայի գեղարվեստական ղեկավար Արմինե Ալեքսանյանը, համերգի կազմակերպումը ոչ միայն երեխաների աշխատանքն ի ցույց դնելն էր, այլ նաև սեպտեմբերի 1-ին ընդառաջ նրանց բարձր տրամադրություն հաղորդելը: «Նմանատիպ նախաձեռնությամբ մինչ այս հանդես ենք եկել ինչպես Երևանում, այնպես էլ Կոտայքում, հիմա արդեն հերթը Շիրակինն է: Ուրախ եմ, որ պարի հանդեպ սերը համախմբել է Արթիկի տարածաշրջանի 7 գյուղերի 120 երեխայի: Ի դեպ, այս համերգի համար տարածքի ընտրությունը երեխաներինն էր՝ կարևորելով Հառիճի դերը գիտության ու ապագա հոգևորականների կրթության գործում»,-նշեց Արմինե Ալեքսանյանը:
Արմենուհի Մխոյան
Բաժանորդագրվեք մեր ալիքին Telegram-ում