ԵՐԵՎԱՆ, 29 ՕԳՈՍՏՈՍԻ, ԱՐՄԵՆՊՐԵՍ: ՀՀ նախագահ Սերժ Սարգսյանն իր նստավայրում հյուրընկալեց «Կենգուրու» միջազգային մաթեմատիկական մրցույթի հաղթողներին, 2013-2014 ուստարվա մեդալակիր շրջանավարտներին, միջազգային օլիմպիադաներում հաղթած աշակերտներին: Նախագահ Սարգսյանը ողջունելով ներկա և նախկին դպրոցականներին, հպարտություն հայտնեց` անվանելով նրանց հերոսներ: «Ապրեք, դուք մեր երկրի ապագան եք, մենք բոլորս ձեզնով հպարտանում  ենք: Հպարատանում ենք ոչ ավելի քիչ, քան ձեր ծնողները, ուսուցիչները: Երանի թե մեր բոլոր քաղաքացիները ձեզ նման պարտաճանաչ լինեին ու ձեզ նման արդյունավետ աշխատեին ու սովորեին: Շատ կարևոր եմ համարում, որ ձեր ձեռքբերումները լինեն շարունակական»,-ասաց Սերժ Սարգսյանը:

Նրա խոսքով` պետք է անընդհատ աշխատել, ջանք գործադրել ու կատարելագործվել: «Քիչ չեն օրինակները,երբ դպրոցականն ուսման ընթացքում չի փայլում իր հաջողություններով, բայց ապագայում իր աշխատասիրությամբ, իր նպատասկասլացության շնորհիվ հասնում է մեծ հաջողությունների: Բայց, ցավոք սրտի, քիչ չեն նաև օրինակները, երբ գերազանց սովորող աշակերտները բավարարվում են այդ հաջողություններով, իրենց համարում են ամենագետ և դադարում են մեծ ջանքեր գործադրելուց: Ակնհայտ է, թե արդյունքներն այս դեպքերում ինչպիսին են լինում: Սրանք ձեր առաջին հաջողություններն են, բոլորդ պետք է հասկանաք, որ պետք է մեծ ջանքեր գործադրել»,-«Արմենպրես»-ի հաղորդմամբ` ընդգծեց Նախագահը` շեշտելով, որ ժամանակակից աշխարհում չկա մի մասնագիտություն, որը վերապատրաստման կարիք չունենա:

«Վերապատրաստվում են աշխարհահռչակ բժիշկները, ակադեմիկոսները, բոլորը, քանի որ ժամանակակից աշխարհը շատ արագ է զարգանում, գիտելիքի քանակը մեծ է և, որքան մարդիկ սովորում են, այնքան շատ էլ հասկանում են, թե որքան քիչ բան գիտեն: Սա շատ կարևոր է»,-նշեց Սերժ Սարգսյանը:

Դիմելով դպրոցը գերազանցությամբ ավարտած նախկին աշակարտներին` Նախագահը նշեց, որ նրանք բավականաչափ բարձր նշաձող են սահմանել ու այլևս իրավունք չունեն դրանից ցածր արդյունքներ ցուցաբերել:

««Կենգուրու» մրցույթի հաղթողներին ցանկանում եմ, որ մեծ պատասխանատվությամբ և պատվով պատրաստ լինեք շարունակելու այն մարաթոնն ու էստաֆետը, որ սկսել ու շատ մեծ պատասխանատվությամբ տանում են ձեզնից ավագները: Ես վստահ եմ, որ այս փոքրիկներից շատերը տարիներ հետո լինելու են այս դահլիճում և արդեն այլ կարգավիճակում: Միջազգային առարկայական օլիմպիադաների մրցանակակիրներին ցանկանում եմ ասել` դուք հրաշք եք կամ  էլ հրաշագործ: Ես ձեզնով հպարտանում եմ, ձեզնով հպարտանում է մեր ողջ ժողովուրդը: Այս օրերի ընթացքում բազմիցս առիթ եմ ունեցել իմ հպարտությունն ու ուրախությունը հայտնել ի լուր ողջ աշխարհի: Երբ երկու տարի առաջ ձեզանից ավագները կարողացան միջազգային առարկայական օլիմպիադաներում նվաճել 16 մեդալ, շատերը դա համարում էին պատահականություն, ոմանք էլ նույնիսկ իրենց թույլ էին տալիս դրա մասին բարձրաձայն արտահայտվել: Նույն այնպես, ինչպես մենք առաջին անգամ դարձանք համաշխարհային շախմատային օլիմպիադայի հաղթողներ, բոլորն էլ ասում էին պատահակություն է: Այնուհետև կյանքը ցույց տվեց, որ դա պատահականություն  չէ: Այս տարի էլ, երբ  դուք նվաճեցիք 16 մեդալ, դուք հերոսություն արեցիք: Դա շատ ավելին է, քան մեր անմիջական հարևանները միասին արեցին: Ձեր նվաճած մրցանակները գրեթե այնքան են, որքան մեզնից քսան, երեսուն անգամ ավելի բնակչություն ունեցող երկրներինն է»,-հավելեց Սերժ Սարգսյանը:

Երկրի Նախագահն ուրախալի համարեց այն հանգամանքը, որ դահլիճում հավաքված երեխաները կարողանում են ցանկացած խնդրի լուծում գտնել` միևնույն ժամանակ կարևորելով փաստը, որ նրանցից յուրաքանչյուրն ունի ինքնուրույն մտածողություն: «Մեր արվեստագետներից մեկն ասել է` որպեսզի ունենաս պետական մտածողություն, ապա առնվազն պետք է ունենաս սեփական մտածողություն: Ես վստահ, որ ձեր սեփական մտածողությունը վերածվելու է պետական և քաղաքացիական մտածողության»,-ավելացրեց Սերժ Սարգսյանը:

«Կենգուրու» միջազգային մաթեմատիկական մրցույթը Հայաստանում անցկացվում է 2009 թվականից: 2014-ին մրցույթին մասնակցել է 3-12-րդ դարսարանի 43 հազար 827 աշակերտ ՀՀ և Արցախի 1040 դպրոցներից:

2013-2014  ուսումնական տարվա ՀՀ հանրակրթական ուսումնական հաստատությունների մեդալակիր շրջանավարտները 47-ն են: 2014 թվականի դպրոցականների միջազգային վեց օլիմպիադաների մեդալակիրները 16-ն են: