Թուրքիայում ձերբակալվել են միգրանտների ապօրինի տեղափոխմամբ զբաղվող երկու ադրբեջանցի նավապետներ
ԵՐԵՎԱՆ, 20 ՕԳՈՍՏՈՍԻ, ԱՐՄԵՆՊՐԵՍ: Թուրքիայում ձերբակալվել են երկու ադրբեջանցի նավապետներ, որոնք ապօրինի ճանապարհով փորձել են հարյուրից ավելի միգրանտներ տեղափոխել հունական Ռոդոս կղզի:
Ինչպես հաղորդում է «Արմենպրես»-ը` վկայակոչելով թուրքական ԶԼՄ-ները, ադրբեջանցի նավապետները ձերբակալվել են թուրքական իրավապահ մարմինների կողմից ծովում եւ ցամաքում միաժամանակ անցկացված օպերատիվ գործողությունների արդյունքում: Այդ անձինք Vagabund անունով գերմանական դրոշով 10 մ երկարությամբ մոտորանավակի նավապետներն են:
Թուրքիայի առափնյա պաշտպանության ուժերի եւ ժանդարմերիայի գործողությունների արդյունքում հաջողվել է բերման ենթարկել 155 միգրանտների:
Իրավապահները կանգնեցրել են հունական Ռոդոս կղզու ուղղությամբ շարժվող նավակը: Նավակում անցկացված ստուգումների ժամանակ 56 միգրանտներ են հայտնաբերվել, որոնց մեջ 5 կին եւ 3 երեխաներ են եղել: Նրանք Բիրմայի, Իրանի, Սիրիայի, Աֆղանստանի քաղաքացիներ են: Ադրբեջանցի նավապետները խոստացել են միգրանտներին փոխադրել Հունաստանի Ռոդոս կղզի, այնտեղից էլ` Իտալիա:
Ադրբեջանի քաղաքացի նավապետները ձերբակալվել են Մուղլայի ժանդարմերիայի կողմից:
Մուղլայի մոտակայքում թուրքական իրավապահների անցկացրած գործողությունների արդյունքում հայտնաբերվել են Ռոդոս մեկնելու համար սպասող եւս 99 միգրանտներ: Նրանցից 79-ը Սիրիայի, 14-ը` Բիրմայի, 5-ը` Աֆղանստանի, մեկը` Ադրբեջանի քաղաքացիներ են եղել: Նրանք հայտնել են, որ սպասում էին ադրբեջանցի նավապետներին, որոնք խոստացել էին իրենց փոխադրել Հունաստանի Ռոդոս կղզի:
Ներկայում որոնումներ են սկսվել միգրանտներին ապօրինի ճանապարհով Հունաստան փոխադրումները կազմակերպող հանցավոր խմբի անդամներին հայտնաբերելու եւ ձերբակալելու ուղղությամբ:
Բաժանորդագրվեք մեր ալիքին Telegram-ում