ՀՀ նախկին վարչապետ, պետական, քաղաքական գործիչ Անդրանիկ Մարգարյանի մահվան տարելիցի կապակցությամբ ՀՀ Ազգային ժողովի նախագահ Հովիկ Աբրահամյանը, Վարչապետ Տիգրան Սարգսյանը, բարձրաստիճան այլ պաշտոնյաներ այսօր այցելել են Կոմիտասի անվան զբոսայգու պանթեոն:

            Պանթեոն էին այցելել նաև Անդրանիկ Մարգարյանի ընտանիքը՝ որդու` Երևանի քաղաքապետ Տարոն Մարգարյանի գլխավորությամբ, հանրապետական կուսակցության ներկայացուցիչներ, քաղաքական, մշակութային գործիչներ: Հոգեհանգստյան կարգից հետո ներկաները ծաղիկներ դրեցին Անդրանիկ Մարգարյանի շիրիմին եւ խնկարկեցին նախկին վարչապետի հիշատակը:

            Հասարակական-քաղաքական գործիչ, ՀՀ վարչապետ (2000-2007), ՀՀԿ նախագահ Անդրանիկ Մարգարյանը ծնվել է 1951թ. հունիսի 12-ին, հանկարծամահ է եղել կյանքի 56-րդ տարում, 2007թ.-ի մարտի 25-ին: Անդրանիկ Մարգարյանն իր քաղաքական գործունեության ուղենիշ ընտրելով Նժդեհի գաղափարները՝ 1966 թ-ից հանդես է եկել խորհրդային տոտալիտար համակարգի քննադատությամբ: 1968 թ-ից եղել է խորհրդային տարիներին անլեգալ գործող Ազգային միացյալ կուսակցության անդամ, 1973 թ-ից՝ ԱՄԿ խորհրդի անդամ։ 1974 թ. ձերբակալվել է եւ դատապարտվել երկու տարվա ազատազրկման: Ղարաբաղյան պատերազմի տարիներին գործուն մասնակցություն է ունեցել կամավորական ջոկատների ստեղծման, Արցախ զենք, զինամթերք եւ սննդամթերք առաքման աշխատանքներին, մասնակցել է մարտական գործողություններին: 1998 թ-ից Երկրապահ կամավորականների միության (ԵԿՄ) անդամ է, այնուհետև՝ ԵԿՄ վարչության անդամ:

Պարգեւատրվել է ՀՀ ՊՆ «Գարեգին Նժդեհ», «Արամ Մանուկյան», «Ֆրիտյոֆ Նանսեն», «Վազգեն Սարգսյան», ԵԿՄ մեդալներով։ 1992 թ. հունիսի 9-ից ՀՀԿ անդամ է, 1992 թ. հոկտեմբերին, 1993 թ. փետրվարին ընտրվել է ՀՀԿ խորհրդի անդամ: 1993 թ. դեկտեմբերին, 1994 թ., 1995 թ. դեկտեմբերի 2-ին (ՀՀԿ 2-րդ համագումար) ընտրվել է ՀՀԿ խորհրդի նախագահ: 2000թ-ից ՀՀ վարչապետ էր եւ պաշտոնավարել է մինչեւ 2007թ-ը: