ԵՐԵՎԱՆ, 4 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի Հանրապետության Փաստաբանների պալատին տարեկան հատկացվում է 1 մլն ԱՄՆ դոլար, ինչի համար երբևէ հաշվետվություն չի ներկայացվել: Այս մասին սեպտեմբերի 4-ին հրավիրած ասուլիսում հայտնեց ՀՀ Փաստաբանների պալատի նախագահի թեկնածու Տիգրան Աթանեսյանը: Նա վստահեցրեց, որ այդ հանգամանքն իր համար անակնկալ էր և ինքը պալատում երբեք չէր լսել այդքան մեծ գումարների մասին: «Փաստաբանների պալատին պետության կողմից տրվող գումարները ուսումնասիրելիս հասկանալի է դառնում, որ տարեկան 350 հազար ԱՄՆ դոլար  օդի մեջ է մնում: 2013թ.-ին, պետական բյուջեի մասին օրենքով` Հանրային պաշտպանի գրասենյակին հատկացվել է ավելի քան 260 մլն դրամ: Գումարը տրված է «այլ նպաստներ բյուջեից» հոդվածով, իսկ դա նշանակում է, որ հանրային պաշտպանին տրվում է ոչ թե աշխատավարձ, այլ նպաստ, որը պետք է չհարկվի»,- «Արմենպրես»-ի փոխանցմամբ` ասաց Տիգրան Աթանեսյանը` հավելելով, որ տեղյակ է, որ հանրային պաշտպաններից գանձումներ են արվում:

Նա տեղեկացրեց, որ 56 հանրային պաշտպանի 250 հազար դրամի չափով աշխատավարձ տալու դեպքում անհետանում է 80 մլն դրամ: Իսկ հաշվարկները ցույց են տալիս, որ ՓՊ-ը պետբյուջեին պետք է մուծեր տարեկան 40 մլն դրամ հարկ, սակայն 2012թ.-ին այդ գումարը կազմել է 3 մլն: «Ես ՓՊ նախորդ նախագահական ընտրություններին ընտրել եմ Ռուբեն Սահակյանին, վստահել եմ նրան, սակայն երբեք չեմ պատկերացրել, որ նա նման գործունեությամբ կարող է զբաղվել: Եթե ես չդառնամ պալատի նախագահ, միևնույն է` հետամուտ եմ լինելու խնդրի լուծմանը»,- վստահեցրեց Աթանեսյանը:

ՓՊ նախագահ Գագիկ Սահակյանն էլ «Արմենպրես»-ին խոստացավ առաջիկայում հրապարակել աուդիտի եզրակացությունը, ինչը համապարփակ կպատասխանի բոլոր հարցերին:

ՀՀ Փաստաբանների պալատի նախագահի ընտրությունները տեղի կունենան 2013թ.-ի սեպտեմբերի 14-ին: Քվեարկությունը կսկսվի ժամը 09:00-ին և կավարտվի 17:00-ին: Փաստաբանների պալատում կբացվի տեղամաս, և փաստաբանները գաղտնի քվեարկություն կկատարեն: Պալատի նախագահը ընտրվում է չորս տարին մեկ:

Կա երեք առաջադրված թեկնածու, որոնցից երկուսը` Տիգրան Աթանեսյանն ու Կրոմվել Գրիգորյանն, ինքնաառաջադրվել են, իսկ Արա Զոհրաբյանին առաջադրել է ՓՊ գործող նախագահ Ռուբեն Սահակյանը: ՀՀ փաստաբանների պալատում կա արտոնագիր ունեցող 1670 փաստաբան: