368.42
Ստորագրահավաք` Անահիտ աստվածուհու արձանի մասունքները վերադարձնելու համար
2 րոպեի ընթերցում
ԵՐԵՎԱՆ,17 ՓԵՏՐՎԱՐԻ, ԱՐՄԵՆՊՐԵՍ: Անահիտ աստվածուհու արձանի մասունքները Բրիտանական թանգարանից Հայաստան վերադարձնելու նպատակովՀայաստանի երիտասարդական հիմնադրամը ստորագրահավաք է իրականացնում։
Ինչպես «Արմենպրես»-ին տեղեկացրին հիմնադրամից, ՀՀ-ում Մեծ Բրիտանիայի և Հյուսիսային Իռլանդիայի Միացյալ Թագավորության դեսպաններ Քեթրին Ջեյն Լիչին և Ջոնաթան Ջեյմս Էյվսին հասցեագրված ուղերձի տեքստում մասնավորապես նշված է. «Մենք՝ ներքոստորագրյալներս, հանդես ենք գալիս հայկական մշակութային և պատմական արժեքները հայրենիք վերադարձնելու նախաձեռնությամբ։ Աշխարհի թանգարաններում այսօր պահպանվում և ցուցադրվում են բազմաթիվ ստեղծագործություններ, որոնք հայկական մշակույթի նմուշներ են։ Մշակութային այդ արժեքների թվում են Բրիտանական թանգարանում պահպանվող Անահիտաստվածուհու բրոնզաձույլ գլուխը և ձեռքերը։ Մենք կոչ ենք անում Հայաստանին վերադարձնել մշակութային այդ մասունքները, քանի որ արվեստի և պատմական արժեքները պետք է պահպանվեն ու ցուցադրվեն այն երկրում, որտեղ ստեղծվել են և որի պատմության կրողներն են»։
Դեսպաններին հղված ուղերձում երախտիքի խոսք է ասվում Մեծ Բրիտանիային՝ հայկական մշակութային ժառանգությունը թուրքական վանդալիզմից փրկելու և պահպանելու համար, սակայն «պատմական արդարությունը պահանջում է, որպեսզի Անահիտ աստվածուհու արձանի մասունքները հայրենադարձվեն և հանգրվանեն ծագման երկրում»։ Նախաձեռնողները համոզմունք են հայտնում, որ Մեծ Բրիտանիան կհարգի նախաձեռնությունը և կվերադարձնի Անահիտ աստվածուհու արձանի մասունքները:
Բաժանորդագրվեք մեր ալիքին Telegram-ում