ԵՐԵՎԱՆ, 27 ՓԵՏՐՎԱՐԻ, ԱՐՄԵՆՊՐԵՍ։ ՀՀ արդարադատության նախարարության քրեակատարողական ծառայության կենտրոնական մարմնի օպերատիվ վարչության «Վանաձոր» տարածքային բաժնի ծառայողները «Վանաձոր» քրեակատարողական հիմնարկի անվտանգության ապահովման բաժնի ծառայողների հետ միասին, իրացնելով նշված տարածքային բաժնում ստացված օպերատիվ տեղեկությունները, փետրվարի 26-ին՝ ժամը 12։10-ի սահմաններում, զննել են հիմնարկի բնակելի մասնաշենքի և պահակետերից մեկի հիմնական պատի միջև ընկած տարածքը։

Ինչպես «Արմենպրես»-ին տեղեկացրին ՀՀ արդարադատության նախարարության քրեակատարողական ծառայությունից, նշյալ տեղանքում հայտնաբերվել է ներնետված տոպրակ՝ ամրացված թելով։

Ըստ աղբյուրի՝ տոպրակում առկա է եղել պոլիէթիլենով փաթեթավորված, մարիխուանա տեսակի թմրամիջոցին նմանվող, 22 գրամ քաշով, դեղնականաչավուն զանգված։

Նշվում է, որ դեպքի առթիվ ձեռնարկվել են համապատասխան միջոցառումներ։