ევროკავშირმა სომხეთში ჰიბრიდული საფრთხეების წინააღმდეგ ბრძოლის მისიის განთავსება დაამტკიცა

ევროპულმა საბჭომ უსაფრთხოებისა და თავდაცვის პოლიტიკის (CSDP) ფარგლებში სომხეთში ახალი პარტნიორული მისიის დაწყება დაამტკიცა. ამ საკონსულტაციო სამოქალაქო მისიის მიზანია სომხეთის ხელისუფლების მხარდაჭერა, რათა ქვეყანამ გააუმჯობესოს მდგრადობა ჰიბრიდული საფრთხეების მიმართ და გაზარდოს უსაფრთხოების ცვალებად გამოწვევებთან გამკლავების შესაძლებლობები.

„არმენპრესის“ ცნობით, ამის შესახებ ინფორმაცია ევროპული საბჭოს ვებგვერდზე გავრცელდა.

უფრო ადრე, ევროკავშირის საგარეო საქმეთა და უსაფრთხოების პოლიტიკის საკითხებში უმაღლესმა წარმომადგენელმა კაია კალასმა ჟურნალისტებთან ბრიფინგზე განაცხადა, რომ ბრიუსელში გასამართ შეხვედრაზე ევროკავშირის საგარეო საქმეთა მინისტრები დაამტკიცებენ სომხეთისთვის ევროკავშირის ახალი მისიის შექმნას ჰიბრიდული საფრთხეების წინააღმდეგ საბრძოლველად.

„ჩვენ ასევე შევთანხმდებით სომხეთისთვის ახალ პარტნიორულ მისიაზე ჰიბრიდულ საფრთხეებთან და უცხოური ინფორმაციის მანიპულაციასა და ჩარევასთან საბრძოლველად, რომელთაც ისინი რეალურად აწყდებიან“, - განაცხადა კაია კალასმა.

აღნიშნულია, რომ მისია ოფიციალურად 2026 წლის 21 აპრილს შეიქმნა, რათა მხარი დაუჭიროს სომხეთის შესაძლებლობებს ჰიბრიდულ გამოწვევებთან, მათ შორის კიბერსაფრთხეებთან, უცხოური ინფორმაციის მანიპულაციასა და ჩარევასთან (FIMI), ასევე უკანონო ფინანსური ნაკადების კონტროლთან გამკლავებაში.

კერძოდ, მისია სომხეთის სხვადასხვა სახელმწიფო ინსტიტუტს მიაწვდის სტრატეგიულ რჩევებს, ტექნიკურ ექსპერტიზას და განავითარებს ინსტიტუციურ შესაძლებლობებს მსგავსი საფრთხეების წინააღმდეგ საბრძოლველად.

გარდა ამისა, მისია უზრუნველყოფს პრაქტიკულ, ოპერატიულ რჩევებს და შექმნის სპეციალურ საპროექტო ჯგუფს თავისი მანდატით გათვალისწინებული მიზნობრივი ქმედებების განსახორციელებლად, საერთაშორისო პარტნიორებთან მჭიდრო თანამშრომლობით.

გავრცელებულ განცხადებაში აღნიშნულია, რომ EUPM სომხეთში იმოქმედებს როგორც არასააღსრულებო მისია და არ ექნება არანაირი როლი სომხეთის ხელისუფლების გადაწყვეტილების მიღების პროცესებში.

„გასულ კვირას ევროკავშირმა სომხეთს შესთავაზა ეკონომიკური და პოლიტიკური მხარდაჭერის დიდი პაკეტი რუსული ზეწოლის საპირისპიროდ. დღეს ჩვენ ადგილზე განვათავსებთ ევროკავშირის ახალ მისიას. ევროკავშირის ექსპერტები მხარს დაუჭერენ სომხეთის ხელისუფლებას კიბერსაფრთხეებისა და დეზინფორმაციის, ასევე უკანონო ფინანსური ნაკადების წინააღმდეგ ბრძოლაში. ევროკავშირი არის მდგრადი, დამოუკიდებელი სომხეთისა და სომეხი ხალხის საკუთარი ბედის არჩევის უფლების ყველაზე დიდი დამცველი. ჩვენ უზრუნველვყოფთ, რომ სომხეთი მარტო არ დარჩეს გარე იძულების წინაშე“, - აღნიშნა უმაღლესმა წარმომადგენელმა კაია კალასმა.

აღინიშნა, რომ პარტნიორული მისია სომხეთის მთავრობის მოთხოვნით შეიქმნა და ევროკავშირის უფრო ფართო და თანმიმდევრული მიდგომის ნაწილია, რომელიც აერთიანებს მოკლევადიან და გრძელვადიან მხარდაჭერას სომხეთის ეროვნული უსაფრთხოების განმტკიცების ხელშესაწყობად.

განცხადების თანახმად, ეს ასახავს ევროკავშირის მტკიცე ვალდებულებას, მხარი დაუჭიროს ქვეყნის მდგრადობასა და დემოკრატიულ ინსტიტუტებს.

სტრატეგიული რჩევების, სპეციალიზებული ექსპერტიზისა და შესაძლებლობების განვითარების უზრუნველყოფით, მისია დაეხმარება სომხეთს უკეთ აღკვეთოს, გამოავლინოს და უპასუხოს ჰიბრიდულ საფრთხეებს, ქვეყნის სუვერენიტეტის სრული პატივისცემით. მისია ორი წლის საწყისი მანდატით იმოქმედებს და ძირითადად შედგება ევროკავშირის წევრი ქვეყნებიდან მივლენილი ექსპერტებისგან.

მისიას უხელმძღვანელებს კოსმინ გეორგე დინესკუ, რომელიც ამ თანამდებობაზე 2026 წლის 11 ივნისს დაინიშნა. მანამდე ის მსახურობდა მოლდოვას რესპუბლიკაში ევროკავშირის პარტნიორობის მისიის პირველ ხელმძღვანელად.

„2025 წლის 2 დეკემბერს ევროკავშირი-სომხეთის პარტნიორობის საბჭომ დაამტკიცა ევროკავშირი-სომხეთის პარტნიორობის ახალი სტრატეგიული დღის წესრიგი. ევროკავშირი-სომხეთის ყოვლისმომცველი და გაძლიერებული პარტნიორობის შეთანხმების საფუძველზე, სტრატეგიული დღის წესრიგი მნიშვნელოვანი ნაბიჯია ურთიერთობების გაღრმავებისკენ, მათ შორის უსაფრთხოებისა და თავდაცვის სფეროში. მისი ერთ-ერთი პრიორიტეტია თანამშრომლობის გაძლიერება ჰიბრიდული საფრთხეებისა და გარე საინფორმაციო მანიპულაციებისა და ჩარევის წინააღმდეგ ბრძოლაში“, - ნათქვამია განცხადებაში.

აღნიშნულია, რომ 2025 წლის 12 დეკემბერს უმაღლესი წარმომადგენლისადმი გაგზავნილ წერილში სომხეთის საგარეო საქმეთა მინისტრმა არარატ მირზოიანმა ევროკავშირი მოიწვია სომხეთში ევროკავშირის უსაფრთხოებისა და თავდაცვის საერთო პოლიტიკის ფარგლებში სამოქალაქო მისიის განსათავსებლად.

ევროპული საბჭო ხაზს უსვამს, რომ ახალი პარტნიორული მისია სომხეთში უკვე მეორეა, იმის გათვალისწინებით, რომ 2023 წლიდან სომხეთში ასევე მოქმედებს ევროკავშირის სადამკვირვებლო მისია, რომელიც პატრულირებს სომხეთისა და აზერბაიჯანის საზღვრის გასწვრივ.

განცხადებაში ხაზგასმულია, რომ ახალი მისია გამიჯნულია სადამკვირვებლო მისიისგან და არანაირი კავშირი არ აქვს მის საქმიანობასთან.