აშშ-ის სახელმწიფო მდივანმა პრემიერ-მინისტრ ფაშინიანს გამარჯვება მიულოცა

აშშ-ის სახელმწიფო მდივანმა მარკო რუბიომ სომხეთის პრემიერ-მინისტრ ნიკოლ ფაშინიანს საპარლამენტო არჩევნებში მისი ლიდერობით პარტია „სამოქალაქო ხელშეკრულების“ გამარჯვება მიულოცა.

„შეერთებული შტატები მხარს უჭერს პრემიერ-მინისტრ ფაშინიანსა და სომხეთს მშვიდობის დამყარების ძალისხმევაში. ჩვენ ერთგულნი ვართ ვაშინგტონის მშვიდობის ისტორიული სამიტის მიზნების წინ წაწევის, მათ შორის პროექტის - „ტრამპის მარშრუტი საერთაშორისო მშვიდობისა და კეთილდღეობისთვის“ რეალიზაციის. მოუთმენლად ველით ერთობლივ მუშაობას სამხრეთ კავკასიასა და მის ფარგლებს გარეთ მშვიდობის, სტაბილურობისა და კეთილდღეობის უზრუნველსაყოფად“, - „არმენპრესის“ ცნობით, სოციალურ ქსელ X-ის საკუთარ გვერდზე დაწერა რუბიომ.

სომხეთში 7 ივნისს გამართული საპარლამენტო არჩევნების წინასწარი შედეგებით, საკანონმდებლო ორგანოში შესასვლელი ბარიერი სამმა პოლიტიკურმა ძალამ გადალახა: პარტია „სამოქალაქო ხელშეკრულება“ - 727 ათას 160 ხმით (49,825%), ბლოკი „ძლიერი სომხეთი“ - 340 ათას 88 ხმით (23,281%) და ბლოკი „სომხეთი“ - 145 ათას 113 ხმით (9,934%). კენჭისყრის წინასწარი შედეგების მიხედვით, პარტია „სამოქალაქო ხელშეკრულება“ პარლამენტში უმრავლესობის მოპოვებას და მთავრობის ჩამოყალიბებას შეძლებს.