კონფლიქტი სომხეთსა და აზერბაიჯანს შორის დასრულებულია - მარკო რუბიო

ამერიკის შეერთებული შტატების სახელმწიფო მდივანმა მარკო რუბიომ განაცხადა, რომ სომხეთსა და აზერბაიჯანს შორის კონფლიქტი დასრულებულია.

„არმენპრესის“ ცნობით, აშშ-ის სახელმწიფო მდივანმა ამის შესახებ აშშ-ის წარმომადგენელთა პალატის საგარეო საქმეთა კომიტეტში გამართულ მოსმენებზე განაცხადა.

„კონფლიქტი სომხეთსა და აზერბაიჯანს შორის დასრულებულია. და ის არა მხოლოდ დასრულდა, არამედ დაგვირგვინდა შეთანხმებითა და ურთიერთგაგების მემორანდუმით, რომელსაც გუშინ მოვაწერე ხელი და რომელიც საფუძველს უყრის კეთილდღეობის ახალ გზას. საუბარია TRIPP-ის შესახებ, რომელიც ორივე ქვეყნისთვის, განსაკუთრებით კი სომხეთისთვის, სუვერენიტეტის პატივისცემით, უნიკალურ შესაძლებლობებს ქმნის, რათა მათ ამ ყველაფრისგან რეალური სარგებელი მიიღონ“, - განაცხადა რუბიომ.

სომხეთმა და ამერიკის შეერთებულმა შტატებმა 4 ივნისს, დისტანციური წესით, ხელი მოაწერეს ჩარჩო შეთანხმებას TRIPP-ის შესახებ. სომხური მხრიდან დოკუმენტს ხელი მოაწერა საგარეო საქმეთა მინისტრმა არარატ მირზოიანმა, ხოლო ამერიკული მხრიდან - სახელმწიფო მდივანმა მარკო რუბიომ.