ფაშინიანმა და ერდოღანმა სომხეთ-თურქეთის დარეგულირების პროცესი განიხილეს

სომხეთის პრემიერ-მინისტრმა ნიკოლ ფაშინიანმა სატელეფონო საუბარი გამართა თურქეთის პრეზიდენტ რეჯეფ თაიფ ერდოღანთან.

„არმენპრესის“ ცნობით, ამის შესახებ ინფორმაციას თურქეთის პრეზიდენტის ადმინისტრაციის კომუნიკაციის სამმართველო ავრცელებს. აღინიშნა, რომ საუბრისას სომხეთის პრემიერ-მინისტრმა თურქეთის პრეზიდენტს გასული ყურბან ბაირამის დღესასწაული მიულოცა.

მხარეებმა თურქეთ-სომხეთის ორმხრივი ურთიერთობების დარეგულირების პროცესი და რეგიონული საკითხებიც განიხილეს.

რეჯეფ თაიფ ერდოღანმა აღნიშნა, რომ თურქეთსა და სომხეთს შორის ურთიერთობების ნორმალიზების პროცესი პირდაპირი ვაჭრობის დაწყებისკენ მიმართული ნაბიჯებით გრძელდება.

ერდოღანმა ხაზგასმით აღნიშნა, რომ თურქეთი ძალისხმევას არ იშურებს რეგიონში მშვიდობისა და სტაბილურობის უზრუნველსაყოფად და ყოველთვის მხარს დაუჭერს ამ მიმართულებით გადასადგმელ ნაბიჯებს.