1 წუთი კითხვის
სომხეთის პრემიერ-მინისტრმა ნიკოლ ფაშინიანმა განაცხადა, რომ რუსეთის პრეზიდენტ ვლადიმირ პუტინთან გამართული ბოლო სატელეფონო საუბარი პოზიტიურ ატმოსფეროში წარიმართა.
„არმენპრესის“ ცნობით, ამის შესახებ ნიკოლ ფაშინიანმა გამოცემა „იზვესტიასთან“ საუბრისას აღნიშნა.
„გუშინ რუსეთის პრეზიდენტს ვესაუბრე და, რა თქმა უნდა, მადლობა გადავუხადე ზარისთვის. მან დაბადების დღის მოსალოცად დარეკა. ჩვენ მიმდინარე საკითხებზე ვისაუბრეთ და ჩვენი საუბარი პოზიტიური იყო“, - განაცხადა პრემიერ-მინისტრმა.
შეგახსენებთ, რომ სომხეთის პრემიერ-მინისტრ ნიკოლ ფაშინიანისა და რუსეთის პრეზიდენტ ვლადიმირ პუტინის სატელეფონო საუბარი 1 ივნისს შედგა. რუსეთის ლიდერმა ფაშინიანს დაბადების დღე მიულოცა. მხარეებმა ორმხრივი და მრავალმხრივი დღის წესრიგის მიმდინარე საკითხები განიხილეს, ფაშინიანმა კი პუტინს მადლობა გადაუხადა მეგობრული ტონალობის, მხარდაჭერისა და მთელ რიგ საკითხებთან დაკავშირებით დაკავებული ბალანსირებული პოზიციისთვის.