2 წუთი კითხვის
სომხეთის რესპუბლიკა და ამერიკის შეერთებული შტატები უახლოეს მომავალში საბოლოოდ მოაწერენ ხელს სტრატეგიული თანამშრომლობის ჩარჩო შეთანხმებას პროექტის - „ტრამპის მარშრუტი საერთაშორისო მშვიდობისა და საერთაშორისო კეთილდღეობისთვის“ თაობაზე. „არმენპრესის“ ცნობით, ამის შესახებ ნორ ჰაჩნში, საპარლამენტო არჩევნების წინასაარჩევნო კამპანიის მსვლელობისას, განაცხადა შვებულებაში მყოფმა სომხეთის პრემიერ-მინისტრმა და პარტია „სამოქალაქო შეთანხმების“ პრემიერობის კანდიდატმა ნიკოლ ფაშინიანმა.
„სომხეთის რესპუბლიკამ და ამერიკის შეერთებულმა შტატებმა შეათანხმეს TRIPP პროექტის განხორციელების შესახებ შეთანხმების ტექსტი. პროექტი TRIPP რეალობად იქცევა. ტექსტი შეთანხმებულია და მზად არის საბოლოო ხელმოწერისთვის, რაც უახლოეს პერიოდში განხორციელდება. ეს ნიშნავს, რომ სომხეთის რესპუბლიკა სძლევს ბლოკადას, სომხეთის რესპუბლიკა აღარ იქნება ბლოკირებული სახელმწიფო და კონფლიქტის ჩიხიდან მშვიდობის გზაჯვარედინად გადაიქცევა“, - განაცხადა ფაშინიანმა.
26 მაისს სომხეთმა და ამერიკის შეერთებულმა შტატებმა მოახდინეს სტრატეგიული თანამშრომლობის ჩარჩო შეთანხმების პარაფირება პროექტის - „ტრამპის მარშრუტი საერთაშორისო მშვიდობისა და საერთაშორისო კეთილდღეობისთვის“ თაობაზე. დოკუმენტის პარაფირება აშშ-ის სახელმწიფო მდივნის, მარკო რუბიოს სომხეთში ვიზიტის ფარგლებში შედგა. სომხური მხრიდან დოკუმენტს ხელი მოაწერა საგარეო საქმეთა მინისტრმა არარატ მირზოიანმა, ხოლო ამერიკული მხრიდან - სახელმწიფო მდივანმა მარკო რუბიომ.