სომხეთის პრემიერ-მინისტრი სომხეთ-თურქეთის საზღვრის გახსნისა და ბაქოსთან საბოლოო მშვიდობის დადების პროცესებს შეეხო
2 წუთი კითხვის
სომხეთის რესპუბლიკის პრემიერ-მინისტრმა ნიკოლ ფაშინიანმა განაცხადა, რომ გრძელდება მუშაობა სომხეთ-თურქეთის საზღვრის გახსნისა და აზერბაიჯანთან სამშვიდობო შეთანხმების რაც შეიძლება მალე ხელმოწერის მიმართულებით.
„არმენპრესის“ ცნობით, პრემიერ-მინისტრმა ამის შესახებ მთავრობის სხდომის შემდეგ გამართულ ბრიფინგზე ისაუბრა.
„მიმაჩნია, რომ დიდი ხანია დადგა დრო, რომ სომხეთის, აზერბაიჯანისა და თურქეთის ოფიციალური პირების კონტაქტები ყოველდღიური სამუშაო საქმიანობის საერთო აღქმაში იყოს“, - განაცხადა პრემიერმა ზემოხსენებული ქვეყნების მაღალჩინოსნებს შორის ბოლო პერიოდში გააქტიურებული შეხვედრების შესახებ დასმული კითხვის საპასუხოდ.
სომხეთ-თურქეთის საზღვრის გახსნის ბედსა და აზერბაიჯანთან სამშვიდობო ხელშეკრულების საბოლოო ხელმოწერის პერსპექტივებზე საუბრისას, ფაშინიანმა აღნიშნა, რომ ამ მხრივ სიახლეები არ არის.
„ახალი არაფერია, თუმცა ფაქტია, რომ ყოველდღიური მუშაობა მიმდინარეობს. ვცდილობთ ვიპოვოთ შესაძლებლობები ურთიერთობების სხვადასხვა მიმართულებით განვითარებისთვის“, - თქვა პრემიერ-მინისტრმა.
ამ კონტექსტში მან ასევე შეახსენა, რომ ერთ-ერთმა თურქულმა ავიაკომპანიამ უკვე დაიწყო ფრენები სომხეთის მიმართულებით.
„ვიმედოვნებთ, რომ რომელიმე თურქული ავიაკომპანია ფრენებს გიუმრის მიმართულებითაც განახორციელებს“, - აღნიშნა ფაშინიანმა.
პრემიერმა ხაზგასმით აღნიშნა, რომ მისთვის საკითხი იმაში კი არ მდგომარეობს, მოხდება თუ არა სომხეთ-თურქეთის საზღვრის გახსნა ან სომხეთ-აზერბაიჯანის სამშვიდობო ხელშეკრულების ხელმოწერა, არამედ იმაში, თუ როდის მოხდება ეს.
ნიკოლ ფაშინიანის თქმით, ამჟამად მუშაობა მიმდინარეობს იმისთვის, რომ ეს მოვლენები რაც შეიძლება მალე განხორციელდეს.