ნიკოლ ფაშინიანმა და ჯეი დი ვენსმა ხელი მოაწერეს ბირთვული ენერგიის მშვიდობიანი გამოყენების შესახებ განცხადებას

სომხეთის რესპუბლიკის პრემიერ-მინისტრმა ნიკოლ ფაშინიანმა და ამერიკის შეერთებული შტატების ვიცე-პრეზიდენტმა ჯეი დი ვენსმა ხელი მოაწერეს „სომხეთის რესპუბლიკის მთავრობასა და აშშ-ის მთავრობას შორის ბირთვული ენერგიის მშვიდობიანი გამოყენების სფეროში თანამშრომლობის შესახებ შეთანხმებაზე მოლაპარაკებების დასრულების თაობაზე ერთობლივ განცხადებას“.

ნიკოლ ფაშინიანის განცხადებით, აღნიშნული შეთანხმება ახალ ეტაპს გახსნის სომხეთსა და აშშ-ს შორის გაღრმავებული ენერგეტიკული პარტნიორობის პროცესში და ხელს შეუწყობს სომხეთის ენერგეტიკული რესურსების დივერსიფიკაციას უსაფრთხო და ინოვაციური ტექნოლოგიების დანერგვის გზით. მან ასევე მადლობა გამოხატა აშშ-ის მიმართ ბირთვული უსაფრთხოების სფეროში სომხეთისადმი წლების განმავლობაში გაწეული მხარდაჭერისთვის და გამოთქვა მზადყოფნა, კიდევ უფრო განვითარდეს დარგობრივი თანამშრომლობა ორივე ქვეყნისთვის უმნიშვნელოვანეს მიმართულებებში.

„არმენპრესის“ ინფორმაციით, ხელმოწერის ცერემონიას წინ უძღოდა ნიკოლ ფაშინიანისა და ჯეი დი ვენსის პირისპირ შეხვედრა.

აშშ-ის ვიცე-პრეზიდენტი ჯეი დი ვენსი სომხეთს ოფიციალური ვიზიტით 9 თებერვალს ეწვია. იგი ქვეყანაში მეუღლესა და შვილებთან ერთად ჩამოვიდა. ვიზიტის ფარგლებში გაიმართა როგორც ნიკოლ ფაშინიანისა და ჯეი დი ვენსის პირისპირ შეხვედრა, ასევე გაფართოებული შემადგენლობით მოლაპარაკებები.