სომხეთის ეროვნული ასამბლეის კომიტეტმა დაამტკიცა სომხეთსა და საქართველოს შორის რეადმისიის შესახებ შეთანხმების რატიფიკაცია

სომხეთის ეროვნული ასამბლეის საგარეო ურთიერთობათა მუდმივმა კომიტეტმა დადებითი შეფასება მისცა „სომხეთის რესპუბლიკის მთავრობასა და საქართველოს მთავრობას შორის უნებართვოდ მცხოვრები პირების დაბრუნების (რეადმისიის) შესახებ“ შეთანხმების რატიფიკაციის საკითხს. „არმენპრესის“ ინფორმაციით, კომიტეტის სხდომაზე საკითხი წარადგინა შინაგან საქმეთა მინისტრის მოადგილემ არმენ ღაზარიანმა.

„შეთანხმება ეხება ორი სახელმწიფოს ტერიტორიაზე მყოფ ერთმანეთის მოქალაქეებს, რომლებიც შესაბამის ქვეყნებში უკანონო საფუძვლით იმყოფებიან. შეთანხმება განსაზღვრავს პროცედურებს, რომელთა მიხედვითაც ორი ქვეყნის შესაბამის სახელმწიფო უწყებებს შეუძლიათ აღნიშნულ პირებთან დაკავშირებული ინფორმაციის გაცვლა. მოქალაქეობის გაურკვევლობის შემთხვევაში კი განისაზღვრება ის დოკუმენტები, რომელთა მეშვეობითაც დგინდება პირის მოქალაქეობა“, - განაცხადა ღაზარიანმა.

მინისტრის მოადგილემ აღნიშნა, რომ შეთანხმების მიზანია არალეგალური მიგრაციის პრევენცია და შეკავება, ასევე მიგრაციულ სფეროში თანამშრომლობის ჩამოყალიბება.

„სომხეთის რესპუბლიკის მთავრობასა და საქართველოს მთავრობას შორის უნებართვოდ მცხოვრები პირების დაბრუნების (რეადმისიის) შესახებ“ შეთანხმების რატიფიკაციის საკითხი განიხილება პარლამენტის პლენარულ სხდომაზე.