საქართველო ძალიან მოხარულია, რომ სამხრეთ კავკასიაში საბოლოოდ მყარდება მშვიდობა։ ქართველი ექსპერტი

საქართველო დიდად ხარობს, რომ სამხრეთ კავკასიის რეგიონში საბოლოოდ მყარდება მშვიდობა. თბილისში იმედოვნებენ, რომ სომხეთსა და აზერბაიჯანს შორის აქამდე არსებული პრობლემებიც გადაწყვეტას ჰპოვებს.

საერთაშორისო ორდღიანი კონფერენციის „ორბელი ფორუმი։ მშვიდობისა და მრავალმხრივი თანამშრომლობის მშენებლობა“ ფარგლებში, „არმენპრესთან“ საუბრისას ამის შესახებ განაცხადა საქართველოს საზოგადოებრივ საქმეთა ინსტიტუტის საერთაშორისო ურთიერთობების მაგისტრატურის ხელმძღვანელმა, პროფესორმა თორნიკე შარაშენიძემ, სომხეთსა და აზერბაიჯანს შორის სამშვიდობო შეთანხმების წინასწარ ხელმოწერაზე კომენტირებისას.

„ჩვენ ძალიან გვიხარია, რომ ბოლოს და ბოლოს მშვიდობა მოდის რეგიონში. ყოველთვის მხარს ვუჭერდით ყარაბაღის საკითხის მშვიდობიან გადაწყვეტას, რაც, სამწუხაროდ, ადრე ვერ მოხერხდა“, - აღნიშნა შარაშენიძემ.

მისი თქმით, ის ფაქტი, რომ სომხეთსა და აზერბაიჯანს შორის დამყარდა მშვიდობა, საქართველოში აღიქმება როგორც ძალზე მნიშვნელოვანი მოვლენა, არა მხოლოდ იმიტომ, რომ რეგიონს მშვიდობა სჭირდება, არამედ იმიტომაც, რომ საქართველოც არ არის სრულიად უსაფრთხო ქვეყანა, რადგან თბილისის მახლობლად რუსული სამხედრო ბაზაა განლაგებული.

„რეგიონში მიმდინარე ყველა მოვლენას დიდი სიფრთხილით ვაკვირდებით. ნებისმიერი კონფლიქტი ჩვენთვის საფრთხეს წარმოადგენს. ნამდვილად ვიმედოვნებთ, რომ ბოლოს და ბოლოს ყველა ის პრობლემა, რომელიც დღემდე არსებობდა ბაქოსა და ერევანს შორის, თავის გადაწყვეტას იპოვის“, - აღნიშნა ქართველმა ექსპერტმა.

სომხეთსა და საქართველოს შორის სახელმწიფოთაშორისი ურთიერთობების ამჟამინდელი დონის შეფასებისას შარაშენიძემ აღნიშნა, რომ ორმხრივი კავშირები და პარტნიორობა დღეს უფრო მაღალ დონეზეა, ვიდრე საბჭოთა კავშირის დაშლის პერიოდში.

„საბჭოთა კავშირის დაშლის შემდეგ სომხეთი გახდა დამოუკიდებელ სახელმწიფოთა თანამეგობრობის (დსთ) და კოლექტიური უსაფრთხოების ხელშეკრულების ორგანიზაციის (კუხო) წევრი, რის გამოც, ალბათ, საქართველო მას რუსეთის მოკავშირედ აღიქვამდა. ყველასთვის ცნობილია, რომ ჩვენსა და რუსეთს შორის ურთიერთობები არცთუ ისე კარგად განვითარდა - აფხაზეთისა და სამხრეთ ოსეთის გამო და სხვა მიზეზებით. მიუხედავად ამისა, გულწრფელად მჯერა, რომ ქართველთა უმრავლესობა სომხებს ყველაზე ახლო ხალხად მიიჩნევს. ჩვენ მრავალ მხრივ მართლაც ძალიან ვგავართ ერთმანეთს, ამას ყოველთვის ვგრძნობ, როცა აქ, სომხეთში ვიმყოფები“, - აღნიშნა თორნიკე შარაშენიძემ.