ფაშინიანმა დაადასტურა სომხეთის მზადყოფნა უზრუნველყოს აზერბაიჯანსა და თურქეთს შორის სატრანზიტო გადაზიდვები თავისი ტერიტორიის გავლით

სომხეთი მზად არის უკვე დღიდანვე უზრუნველყოს აზერბაიჯანიდან თურქეთსა და თურქეთიდან აზერბაიჯანში ტვირთების ტრანზიტი მარგარადან კორნიძორის მიმართულებით.

როგორც „არმენპრესი“ იუწყება, სომხეთის რესპუბლიკის პრემიერ-მინისტრმა ნიკოლ ფაშინიანმა ქვეყნის მზადყოფნა დაადასტურა 6 ნოემბრის მთავრობის სხდომაზე.

პრემიერ-მინისტრმა გაიხსენა, რომ დღეს სომხეთში შემოვიდა მარცვლეულის პირველი პარტია რუსეთ–აზერბაიჯანი–საქართველო–სომხეთის სარკინიგზო მარშრუტით.

ფაშინიანმა ამ მოვლენას მნიშვნელოვანი და ისტორიული უწოდა. მისივე თქმით, უახლოეს მომავალში სომხეთში ყაზახეთიდანაც მოვა ახალი ხორბლის პარტია, კვლავ აზერბაიჯანის ტერიტორიის გავლით.

„ეს ასევე მნიშვნელოვანი ეტაპია ვაშინგტონში მიღწეული შეთანხმებებისა და ვაშინგტონის დეკლარაციის პუნქტების შესრულების თვალსაზრისით. კიდევ ერთხელ ვადასტურებ სომხეთის მზადყოფნას, უკვე დღიდანვე უზრუნველყოს აზერბაიჯანიდან თურქეთსა და თურქეთიდან აზერბაიჯანში ტვირთების ტრანსპორტირება მარგარადან კორნიძორის მიმართულებით. ნახევარ საათში სატვირთო ავტომობილები მიადგებიან საგუშაგოებს, როგორც კორნიძორის, ისე მარგარას მხრიდან, და ჩვენ მზად ვართ უზრუნველვყოთ მათი მომსახურება“, - განაცხადა ფაშინიანმა.

ადრე აზერბაიჯანის პრეზიდენტმა ილჰამ ალიევმა განაცხადა, რომ აზერბაიჯანმა გააუქმა ყველა შეზღუდვა თავისი ტერიტორიის გავლით სომხეთის მიმართულებით ტვირთების ტრანზიტზე და აღნიშნა, რომ ყაზახეთიდან ხორბლის პირველი პარტია სომხეთში აზერბაიჯანის გავლით გაიგზავნება. ალიევის ამ განცხადებას მიესალმა სომხეთის პრემიერ-მინისტრი ნიკოლ ფაშინიანი, რომელმაც თავის მხრივ აღნიშნა, რომ სომხეთიც აუქმებს ყველა შეზღუდვას თავისი ტერიტორიის გავლით აზერბაიჯანსა და თურქეთში ტვირთების ტრანზიტის უზრუნველსაყოფად.

6 ნოემბრის ღამეს სომხეთში ჩავიდა დაახლოებით 1000 ტონა ხორბალი, რომელიც რუსეთიდან აზერბაიჯანის ტერიტორიის გავლით გადაიგზავნა. რუსეთმა უკვე გამოაცხადა, რომ უახლოეს პერიოდში სომხეთში დამატებით 132 ვაგონ ხორბალს გააგზავნის, კვლავ აზერბაიჯანის გავლით.