2 წუთი კითხვის
რუსეთი 2026 წლის იანვრის ბოლომდე სომხეთში გაგზავნის დამატებით 132 ვაგონ ხორბალს აზერბაიჯანის ტერიტორიის გავლით გამავალი ახალი სარკინიგზო მარშრუტით․ როგორც „არმენპრესი“ იუწყება, ამის შესახებ განცხადება გააკეთა რუსეთის ტრანსპორტის სამინისტრომ.
„2026 წლის იანვრის ბოლომდე დაგეგმილია ამ მარშრუტით კიდევ 132 ვაგონ ხორბლის გადაზიდვა. ასევე განიხილება სხვა ტიპის ტვირთების ტრანსპორტირების შესაძლებლობები“, - ნათქვამია განცხადებაში, რომელსაც „ტასსი“ ავრცელებს.
რუსეთის ტრანსპორტის სამინისტროში აღნიშნეს, რომ ეს არის პირველი შემთხვევა 1990-იანი წლებიდან მოყოლებული, როდესაც სომხეთში ტვირთები აზერბაიჯანის ტერიტორიის გავლით გადადის.
რუსული ხორბლით დატვირთული მატარებელი (15 ვაგონი) 6 ნოემბრის დილით სომხეთში ჩავიდა, აზერბაიჯანისა და საქართველოს ტერიტორიის გავლით.
რუსული მხარის ინფორმაციით, სომხეთში გაგზავნილია 1000 ტონაზე მეტი ხორბალი.
სომხეთის პრემიერ-მინისტრის აპარატმა ხაზგასმით აღნიშნა, რომ აზერბაიჯანის მიერ სომხეთის მიმართულებით სატვირთო გადაზიდვებზე შეზღუდვების მოხსნა მნიშვნელოვანია რეგიონული კომუნიკაციების აღდგენისა და ეკონომიკური თანამშრომლობის ხელშეწყობის კონტექსტში. პრემიერის აპარატში ასევე აღნიშნეს, რომ ეს არის ერთ-ერთი პრაქტიკული შედეგი ვაშინგტონში მიღწეული შეთანხმებების განხორციელების გზაზე.