სომხეთის რესპუბლიკის გარემოს დაცვის მინისტრმა და პეტრ პირუნჩიკმა გარემოსდაცვით სფეროსთან დაკავშირებული საკითხები განიხილეს

სომხეთის რესპუბლიკის გარემოს დაცვის მინისტრმა ჰამბარძუმ მათევოსიანმა შეხვედრა გამართა სომხეთში ჩეხეთის რესპუბლიკის საგანგებო და სრულუფლებიან ელჩთან პეტრ პირუნჩიკთან.

„არმენპრესის“ ინფორმაციით, მინისტრმა შეხვედრის შესახებ „ფეისბუქის“ საკუთარ გვერდზე დაწერა და აღნიშნა, რომ მათ განიხილეს გარემოსდაცვით სფეროსთან დაკავშირებული რიგი მნიშვნელოვანი საკითხები.

„შევეხეთ ორწლიან Twinning-ის პროგრამას: «ბიომრავალფეროვნების გაძლიერებული დაცვა და მდგრადი გამოყენება სომხეთში ევროკავშირის სტანდარტების შესაბამისად», რომელიც გარემოს დაცვის სამინისტროს კოორდინაციით და ევროკავშირის დაფინანსებით ხორციელდება ჩეხეთისა და ფინეთის რესპუბლიკების მონაწილეობით.

აღვნიშნე, რომ პროგრამა მნიშვნელოვანი წვლილია სომხეთის გარემოსდაცვითი მმართველობის სისტემის გაუმჯობესებაში, განსაკუთრებით ბიომრავალფეროვნების დაცვისა და სპეციალურად დაცული ტერიტორიების ეფექტიანი მართვის მიმართულებით. აღნიშნული პროგრამის ფარგლებში შემუშავებული ახალი საკანონმდებლო მიდგომები და მმართველობის მექანიზმები ხელს შეუწყობს სომხეთის რესპუბლიკისა და ევროკავშირის ყოვლისმომცველი და გაფართოებული პარტნიორობის შეთანხმებით (CEPA) ნაკისრი ვალდებულებების ეფექტიან შესრულებას“, – აღნიშნა ჰამბარძუმ მათევოსიანმა.

საუბრის დროს განიხილეს ასევე პროგრამის უწყვეტობის უზრუნველყოფისა და მომავალში თანამშრომლობის გაღრმავების შესაძლებლობები. ამ კონტექსტში განხილული იქნა თანამშრომლობისა და ერთობლივი ინიციატივების საკითხები ბიომრავალფეროვნების შესახებ კონვენციის მხარეთა 17-ე კონფერენციის (#CoP17) ფარგლებში.

ელჩმა პირუნჩიკმა კიდევ ერთხელ დაადასტურა ჩეხეთის რესპუბლიკის მზადყოფნა, გააგრძელოს მხარდაჭერა სომხეთის გარემოსდაცვით რეფორმებში, განსაკუთრებით ევროკავშირის სტანდარტების დანერგვისა და მდგრადი განვითარების პრინციპების გამოყენების მიმართულებით.

განხილული იქნა აგრეთვე საზოგადოებრივი ორგანიზაციებისა და კერძო სექტორის ჩართვის ფორმატები გარემოსდაცვითი პოლიტიკის ეფექტიანი განხორციელების, საზოგადოებრივი ცნობიერების ამაღლებისა და მონაწილეობითი მმართველობის სისტემის გამყარების მიზნით.

„დარწმუნებული ვარ, რომ ჩვენი ორმხრივი თანამშრომლობა ხელს შეუწყობს სომხეთის გარემოსდაცვითი სფეროს ინსტიტუციურ განვითარებას, საერთაშორისო საუკეთესო გამოცდილების გაზიარებას და ახალი ინიციატივების განხორციელებას – გარემოს დაცვისა და მდგრადი განვითარების მიზნების წინსვლისთვის“, – დაასრულა სომხეთის რესპუბლიკის გარემოს დაცვის მინისტრმა.