თუ ვიხილავთ საფრთხეს სომხეთის უსაფრთხოებისთვის, საზოგადოებას აუცილებლად ვაცნობებთ: ეროვნული უშიშროების საბჭოს მდივანი

სომხეთის რესპუბლიკის მთავრობა უსაფრთხოების საფრთხეების შესახებ ინფორმაციის არსებობის შემთხვევაში აუცილებლად გაუზიარებს მას საზოგადოებას.

„არმენპრესის“ ინფორმაციით, ამის შესახებ ჟურნალისტებთან საუბარში განაცხადა სომხეთის ეროვნული უშიშროების საბჭოს მდივანმა არმენ გრიგორიანმა.

მისი თქმით, თავდაცვის სამინისტრო რეგულარულად აწვდის ინფორმაციას სასაზღვრო ვითარებასთან დაკავშირებით და ასევე უარყოფს აზერბაიჯანიდან გავრცელებულ ყალბ ბრალდებებს.

„ჩვენ განვაგრძობთ მუშაობას ამ მიმართულებით. სომხეთის შეთავაზება კვლავ ძალაშია, შეიქმნას სასაზღვრო ინციდენტების გამოძიების მექანიზმი. ამ საკითხზე ვსაუბრობთ საჯაროდ და ვმუშაობთ, რათა რეალურად გვქონდეს ასეთი მექანიზმი“, – განაცხადა გრიგორიანმა.

კითხვაზე, არსებობს თუ არა ინფორმაცია აზერბაიჯანის მხრიდან სასაზღვრო რაიონებში სამხედრო კონცენტრაციის შესახებ, უშიშროების საბჭოს მდივანმა უპასუხა:
„თუ გვექნება რაიმე ინფორმაცია, რომელიც უკავშირდება სომხეთის უსაფრთხოების მდგომარეობას, ბუნებრივია, საზოგადოებას გავუზიარებთ“.

კითხვაზე, ხედავს თუ არა ომის საშიშროებას, გრიგორიანმა კვლავ ხაზგასმით აღნიშნა:
„თუ სომხეთის რესპუბლიკის უსაფრთხოებას საფრთხე დაემუქრება, ბუნებრივია, საზოგადოებას გავუზიარებთ. თუ გვექნება ინფორმაცია, რომელიც უკავშირდება სომხეთის უსაფრთხოების საფრთხეებს, აუცილებლად გავაზიარებთ“.

ბოლო დღეებში აზერბაიჯანი რეგულარულად ავრცელებს ყალბ ბრალდებებს, თითქოს სომხეთის შეიარაღებული ძალები სასაზღვრო სხვადასხვა უბნებიდან აზერბაიჯანული პოზიციების მიმართულებით ცეცხლს ხსნიან. სომხეთის თავდაცვის სამინისტრომ მსგავსი ყველა ბრალდება უარყო.