აზერბაიჯანი აკრძალულ მეთოდებს იყენებს, რათა სომეხი ტყვეებისგან რეგიონული ესკალაციის პროვოცირებაზე მიმართული ჩვენებები მიიღოს: ფაშინიანი

სომხეთს აქვს დაზვერვის მონაცემები, რომ აზერბაიჯანი ბაქოში დაკავებულ სომეხ ტყვეებზე იყენებს ფსიქოაქტიურ აკრძალულ საშუალებებს, რათა მათგან რეგიონული ესკალაციის პროვოცირებაზე მიმართული ჩვენებები მიიღოს.

„არმენპრესის“ ინფორმაციით, ამის შესახებ სომხეთის პრემიერ-მინისტრმა ნიკოლ ფაშინიანმა საზოგადოებრივი ტელევიზიისთვის მიცემულ ინტერვიუში განაცხადა, სადაც მან უპასუხა მოსაზრებას, თითქოს არაფერს აკეთებენ ბაქოში დაკავებული სომეხი ტყვეების დასაბრუნებლად, რადგან ისინი მის პოლიტიკურ ოპონენტებად მიიჩნევიან. 

„მე იქ მყოფ არც ერთ ადამიანს ჩემს პოლიტიკურ ოპონენტად არ მივიჩნევ და პირიქით, კიდევ უფრო მეტად ვაღიარებ, რომ ის, რაც ხდება, არამხოლოდ სერიოზულად შემაშფოთებელია, არამედ გამოიყენება და გამოყენებული იქნება რეგიონში ახალი ესკალაციების პროვოცირებისთვის. მეტიც, ჩვენ გვაქვს დაზვერვის ინფორმაცია, რომ ამ ადამიანებზე ფსიქოაქტიურ აკრძალულ საშუალებებს იყენებენ, რათა მათგან პროვოკაციული საუბრები და ჩვენებები მიიღონ. ჩვენ ძალიან შეშფოთებულები ვართ ამ პროცესით.

ანუ, თქვენი თქმით გამოდის, რომ ჩვენ თითქოს კმაყოფილები ვართ იმით, რომ ეს ადამიანები იქ არიან? არა, ეს პროცესი გამოყენებული იქნება სომხეთის რესპუბლიკის წინააღმდეგ. იმ ადამიანებისგან ფსიქოაქტიური აკრძალული საშუალებებით შესაძლებელია ისეთი ჩვენებების მიღება, რომლებიც სხვადასხვანაირად იქნება გამოყენებული სომხეთის რესპუბლიკის საწინააღმდეგოდ. ჩვენ ეს საკითხი ძალიან კარგად და სიღრმისეულად გვესმის და ამას სრულად ვაცნობიერებთ,“ – აღნიშნა ფაშინიანმა.

პრემიერ-მინისტრმა დაადასტურა, რომ ტყვეების დაბრუნების პრობლემის გადასაჭრელად ყველა შესაძლო ძალისხმევას იყენებენ.

„დღეს მსოფლიოში არსებობს გეოპოლიტიკური ძალები, რომლებსაც მსგავს სიტუაციაში მყოფი მოქალაქეები სხვადასხვა ქვეყანაში ჰყავთ და წლების განმავლობაში ვერ ახერხებენ მათ დაბრუნებას. ადამიანური და მორალური კუთხე განზე დავდოთ, რადგან ზოგი ფიქრობს, რომ ჩვენ თითქოს ადამიანური და მორალური წესებისგან თავისუფლები ვართ. მაგრამ ეს პირდაპირი საფრთხეა სომხეთისთვის. ჩვენ დაზვერვის მონაცემები გვაქვს, რომ აკრძალული ფსიქოაქტიური საშუალებებით სომხეთის წინააღმდეგ პროვოკაციებს მოამზადებენ. როგორ შეიძლება ამას კმაყოფილებით შევხვდეთ?“ – დაასკვნა ფაშინიანმა.