სომხეთის უშიშროების საბჭოს მდივანმა მაიკლ უოლცს აშშ-ის პრეზიდენტის ეროვნული უსაფრთხოების საკითხებში მრჩევლად დანიშვნა მიულოცა

სომხეთის უშიშროების საბჭოს მდივანმა არმენ გრიგორიანმა მაიკლ უოლცს აშშ-ის პრეზიდენტ დონალდ ტრამპის ეროვნული უსაფრთხოების საკითხებში მრჩევლად დანიშვნა მიულოცა.

„არმენპრესის“ ინფორმაციით, სომხეთის უშიშროების საბჭოს ოფისში აცხადებენ, რომ არმენ გრიგორიანმა მაიკლ უოლცს წარმატებები უსურვა საქმიანობაში და ნდობით აღნიშნა, რომ სომხეთსა და აშშ-ს შორის ორმხრივი ურთიერთობები განვითარების დიდ პოტენციალს ფლობს, ხოლო სომხეთი მზად არის ამ მიმართულებით აქტიური თანამშრომლობისთვის.

უშიშროების საბჭოს მდივანმა მიღწევად დაასახელა 14 იანვარს ვაშინგტონში სომხეთის რესპუბლიკასა და ამერიკის შეერთებულ შტატებს შორის სტრატეგიული პარტნიორობის შესახებ ქარტიის ხელმოწერა და ორმხრივი, ურთიერთსასარგებლო დღის წესრიგის წინ წაწევის მნიშვნელობას გაუსვა ხაზი.