თანამშრომლობის შერწყმა ვერ გახდება პრობლემა: სიმონიანი ევროკავშირთან და რუსეთთან ურთიერთობებზე

სომხეთს ევრაზიული ეკონომიკური კავშირის დატოვების განზრახვა არ აქვს. როგორც „არმენპრესი“ იუწყება, ამის შესახებ განაცხადა სომხეთის ეროვნული ასამბლეის თავმჯდომარემ ალენ სიმონიანმა, ევროკავშირში სომხეთის გაწევრიანების პროცესის დაწყების შესახებ კომენტირებისას.

მისი თქმით, ეს პროცესი სომხეთის რესპუბლიკის ხალხის ნებაა.

„ამ ნებას სომხეთის ეროვნულ ასამბლეაში განვიხილავთ, მივიღებთ გადაწყვეტილებას და მასზე დავაყენებთ კენჭისყრას. ამის შემდეგ ყველაფერი ნათელი გახდება. მაგრამ მე არ ვფიქრობ, რომ რუსეთის მხარე ამ საკითხზე განსაკუთრებული შეშფოთებით უნდა იყოს. ასევე არ მიმაჩნია, რომ თანამშრომლობის შერწყმა რაიმე ფორმით შეიძლება პრობლემად იქცეს. თუ ეს მათთვის პრობლემაა, ჩემი აზრით, არ არსებობს ისეთი საკითხი, რომელიც სომხეთმა და რუსეთმა ვერ განიხილონ და ვერ მოაგვარონ“, – აღნიშნა ალენ სიმონიანმა.

მან ხაზი გაუსვა, რომ სომხეთი სუვერენული სახელმწიფოა და თავად წყვეტს, რა კანონები მიიღოს და რა არის მისი ინტერესებისთვის სასარგებლო.

„ევრაზიული ეკონომიკური კავშირი სომხეთისთვის ეკონომიკური თვალსაზრისით ხელსაყრელი გაერთიანებაა, და ჩვენ მისი დატოვების განზრახვა არ გვაქვს. გვსურს მისი გაგრძელება“, – განაცხადა ეროვნული ასამბლეის თავმჯდომარემ.

რუსეთთან დაკავშირებით დასმულ კითხვაზე სიმონიანმა აღნიშნა:

„ყველაფერი, რასაც რუსეთი რეგიონში სომხეთთან დაკავშირებით კარგავს, მისი საკუთარი ქმედებების შედეგია, სომხეთის რეგიონის დონეზე მარტო დატოვების და რეგიონიდან გასვლის გამო“.

მან დაამატა, რომ არასწორია სომხეთის დადანაშაულება იმაში, რომ ის ცდილობს, დაიცვას თავისი უსაფრთხოება და არსებობა.

სომხეთის მთავრობამ დადებითად შეაფასა „სომხეთის რესპუბლიკის ევროკავშირში გაწევრიანების პროცესის დაწყების შესახებ“ კანონის პროექტი, რომელიც ეროვნულ ასამბლეას წარუდგინა სამოქალაქო ინიციატივა „ევროქვემ“.