აფხაზეთში ოპოზიციასა და მთავრობას შორის მოლაპარაკებები იწყება

ერევანი, 18 ნოემბერი, არმენპრესი. აფხაზეთში მთავრობისა და ოპოზიციის წარმომადგენლები პარლამენტის შუამავლობით იწყებენ მოლაპარაკებებს შექმნილი შიდა პოლიტიკური კრიზისის დასაძლევად.

როგორც „არმენპრესი“ იტყობინება, ТАСС-ის ინფორმაციით, მოლაპარაკებები აფხაზეთის თავდაცვის სამინისტროს ტერიტორიაზე გაიმართება.

წყაროს ცნობით, მოლაპარაკებებში მონაწილეობას მიიღებენ აფხაზეთის ვიცე-პრეზიდენტი ბადრა გუმბა, საბაჟო კომიტეტის თავმჯდომარე ოტარ ხეცია, სუვერენიტეტის დაცვის კომიტეტის ხელმძღვანელი ლევან მიქაა, დეპუტატი კან კვარჩია, ასევე სახალხო მოძრაობის და საზოგადოებრივი ორგანიზაციების წარმომადგენლები.

აფხაზეთში ხელისუფლებასა და ოპოზიციას შორის დაპირისპირება დაიწყო რუსეთის ფედერაციასთან ინვესტიციური შეთანხმების გამო, რომელიც აფხაზეთში საცხოვრებელი სახლების მშენებლობას ითვალისწინებს.

ოპოზიციის მხარდამჭერები თვლიან, რომ აღნიშნული შეთანხმება გამოიწვევს საცხოვრებელი ბინების ფასის ზრდას და რესპუბლიკის მცირე და საშუალო ბიზნესისთვის სერიოზულ რისკებს. პარლამენტს აღნიშნული დოკუმენტის რატიფიცირება 15 ნოემბერს უნდა მოეხდინა, მაგრამ საპროტესტო აქციების გამო პროცესი გადაიდო.

ოპოზიციის მხარდამჭერებმა დაიკავეს სოხუმში მთავრობის შენობების კომპლექსი, მათ შორის პრეზიდენტის რეზიდენცია, და მოითხოვეს პრეზიდენტის გადადგომა.

პრეზიდენტმა ასლან ბჟანიამ ოპოზიციის ქმედებები შეაფასა, როგორც სახელმწიფო გადატრიალების მცდელობა და მოსახლეობას მოუწოდა, არ წამოეგონ პროვოკაციებს.