სომხეთისა და საქართველოს პარლამენტების მეცნიერებისა და განათლების კომიტეტებმა ერთობლივ დეკლარაციას მოაწერეს ხელი

ერევანი, 28 მარტი, არმენპრესი. 28 მარტს, სომხეთის რესპუბლიკის ეროვნული ასამბლეის მეცნიერების, განათლების, კულტურის, დიასპორის, ახალგაზრდობისა და სპორტის მუდმივმოქმედი კომიტეტის თავმჯდომარემ სისაკ გაბრიელიანმა მიიღო საქართველოს პარლამენტის დელეგაცია განათლებისა და მეცნიერების კომისიის თავმჯდომარის გივი მიქანაძის ხელმძღვანელობით. შეხვედრას ასევე ესწრებოდნენ კომისიის თავმჯდომარის მოადგილე თაგუჰი ღაზარიანი, კომისიის წევრები ნარეკ ბაბაიანი და კნიაზ ჰასანოვი. „არმენპრესის“ცნობით, ამის შესახებ ინფორმაციას სომხეთის რესპუბლიკის ეროვნული ასამბლეის პრესსამსახური ავრცელებს.

სისაკ გაბრიელიანმა საქართველოს ევროკავშირში კანდიდატი ქვეყნის სტატუსის მიღება მიულოცა. მან ხაზი გაუსვა, რომ სომხეთისთვის საქართველოსთან ურთიერთობის გაღრმავებას სტრატეგიული მნიშვნელობა აქვს, რაც ასევე ფიქსირდება სომხეთის მთავრობის 2021-2026 წლების სამოქმედო გეგმაში.

ორი ქვეყნის აღმასრულებელ ორგანოებს შორის კონტაქტებთან ერთად, მხარეებმა ხაზი გაუსვეს კანონმდებლების მჭიდრო თანამშრომლობას, რაც ორმხრივი ურთიერთობების ერთ-ერთი მნიშვნელოვანი სფეროა. ხაზი გაესვა სხვადასხვა სფეროში ურთიერთობების გაღრმავების აუცილებლობას, კერძოდ, ორი პარლამენტის მსგავს კომიტეტებს შორის მჭიდრო თანამშრომლობას. ამ კონტექსტში აღინიშნა განათლების რეფორმების საუკეთესო გამოცდილების გაცვლა, დეპუტატებს შორის კონტაქტები, ერთობლივი ღონისძიებებისა და პროგრამების განხორციელება.

გაიმართა აზრთა გაცვლა ორივე ქვეყანაში ზოგადი განათლების, უმაღლესი და პროფესიული განათლებისა და მეცნიერების, ახალგაზრდობისა და სკოლების მშენებლობის სფეროებში განხორციელებულ რეფორმებზე. ქართველ პარტნიორებს „აკადემიური ქალაქის“ პროექტის კონცეფცია წარუდგინეს.

საუბარი ასევე შეეხო ორივე ქვეყანაში მასწავლებელთა პროფესიული გადამზადებისა და სერტიფიცირების ფარგლებში გადადგმულ ნაბიჯებს.

შეხვედრის დასასრულს სისაკ გაბრიელიანმა და გივი მიქანაძემ ორ კომისიას შორის თანამშრომლობის ერთობლივ დეკლარაციას (კომუნიკე) მოაწერეს ხელი. დოკუმენტი ორი კომისიის საქმიანობას ინსტიტუციურ ბაზაზე დააყენებს და თანამშრომლობის ახალ შესაძლებლობებს შექმნის.