«Երևանյան բեսթսելեր». Ն. և Ս. Սարգսյանների հեքիաթն առաջին հորիզոնականում է. Մանկական. հոկտեմբեր

ԵՐԵՎԱՆ, 22 ՆՈՅԵՄԲԵՐԻ, ԱՐՄԵՆՊՐԵՍ: «Արմենպրես» լրատվական գործակալության «Երևանյան բեսթսելեր» հեղինակային նախագիծն այս շաբաթ ներկայացնում է մանկական գեղարվեստական ստեղծագործությունների լավագույն տասնյակը՝ ըստ հոկտեմբերի վաճառքի տվյալների:

Առաջին հորիզոնականում է Նունե և Սավաննա Սարգսյանների «Կապույտ գետաձիուկի և վարդագույն մկնիկի արկածները» հեքիաթը: Գրքի գլխավոր հերոսները Մարթան և Մարտինն են, ովքեր ապրում են մի գեղեցիկ տնակում: Նրանք ամուսնացած էին, բայց, դժբախտաբար, երեխաներ չունեին: Մարտինը քաղաքի ամենամեծ զբոսայգու պարտիզպանն էր, Մարթան՝ աշխատում էր քաղաքի կենդանաբանական այգում…Իսկ թե ինչ է լինում հերոսների հետ՝ կիմանաք գրքում:

Երկրորդ տեղում է Հովհաննես Թումանյանի «Չարի վերջը» բալլադը: Բալլադը պատմում է մի խորամանկ աղվեսի և միամիտ կկվի մասին. վերջինս հավատում է աղվեսի ստին և զոհաբերում իր ձագերին, որպեսզի աղվեսը չքանդի նրա բույնը: Սակայն խելացի ագռավը խորհուրդ է տալիս մի լավ դաս տալ աղվեսին: Երբ աղվեսը նորից գալիս է, կկուն քշում է նրան: Աղվեսն իմանում է, որ կկվին խորհուրդ է տվել ագռավը և որոշում է նրանից վրեժ լուծել ու բռնում է ագռավին: Սակայն ագռավը նրան խաբելով տանում է այնտեղ, որտեղ պառկած էր շունը. վերջինս բռնում է աղվեսին և խեղդում:

Երրորդ հորիզոնականում է բոլոր ժամանակներում ամենաընթերցվող հեղինակներից մեկի` Հովհաննես Թումանյանի «Հեքիաթներ» ժողովածուն: Թումանյանի գործերը պահանջված են բոլոր սերունդների կողմից, դրանք հաճույքով են ընթերցում նաև մեծահասակները: Հեքիաթների հիմքում ընկած են ժողովրդական թեմաներն ու պատումները:

Վարկանիշային աղյուսակի չորրորդ հորիզոնականում կրկին Հովհաննես Թումանյանի հեքիաթներն են: Այս անգամ տասնյակում տեղ է գտել Ամենայն հայոց բանաստեղծի գործերն ամփոփող «Հեքիաթների մոլորակ» ժողովածուն:

Հինգերորդ տեղում է «Հայկական հեքիաթներ» գիրքը: Գրքում ներկայացված հեքիաթները ներառում են իրենց արդիականությունը պահպանած ճշմարտություններ ու արժեքներ:

Վեցերորդ տեղում է Գրիմ Եղբայրների «Մոխրոտը» հեքիաթը: Հեքիաթի սյուժեն հայտնի է բոլորին. մի հարուստ մարդու կինը մահանում է։ Մահվանից առաջ վերջինս դստերը պատվիրում է լինել բարի։ Աղջիկն ամեն օր այցելում է մոր գերեզմանին և լաց լինում, ինչպես նաև կատարում մոր պատվերը։ Գալիս է ձմեռը, հետո գարունը, և հարուստն ամուսնանում է երկրորդ անգամ։ Խորթ մայրը երկու դուստր ուներ՝ չար, բայց հիմար։ Նրանք աղջկանից խլում են գեղեցիկ զգեստները և ուղարկում խոհանոցում ապրելու։ Բայց, ի վերջո, բարին հաղթանակում է. մոխրոտիկին սիրահարվում է արքայազնը...

Յոթերորդ հորիզոնականում Ջ. Ք. Ռոուլինգի «Հարրի Փոթերը և Փիլիսոփայական քարը» գիրքն է: Ծնողներին կորցնելուց հետո Հարրի Փոթերն ապրում է մորաքրոջ ընտանիքի հետ, որտեղ տղային հալածում են, նվաստացնում և գրեթե կիսաքաղց պահում: Սակայն երբ լրանում է Հարրիի տասնմեկ տարին, նրան հրավիրում են Հոգվորթս` աներևակայելի մի դպրոց, որտեղ կարող են սովորել միայն բացառիկ` կախարդական ունակություններով օժտված պատանիներն ու աղջիկները:

Ութերորդ հորիզոնականում Հանս Քրիստիան Անդերսենի «Հեքիաթներ»-ն է։ Համաշխարհային գրականության դասականի ստեղծագործությունները քաջ հայտնի են բոլոր փոքրիկներին ոչ միայն գրքի, այլև մուլտֆիլմերի ու գեղարվեստական լիամետրաժ ֆիլմերի տեսքով, քանի որ դրանց զգալի մասն էկրանավորվել է:

Իններորդ հորիզոնականում Շառլ Պերոյի «Կարմիր գլխարկը» հեքիաթն է: Այն կարծես օրորոցային լինի փոքրիկների համար, հետևաբար քաջ հայտնի է բոլորին: «Կարմիր գլխարկը» ամենահայտնի հեքիաթներից է և սիրված է բոլորի կողմից:

Տասներորդ տեղում է Հ. Ք. Անդերսենի «Ձյունե թագուհին»: Հանրահայտ հեքիաթը ներկայացված է յուրատիպ լուծումով: Գրքում ներառված են ստվարաթղթե հերոսներ, որոնք առանձնացվում են, և դրանց օգնությամբ երեխան «բեմականացնում է» սեփական ներկայացումը:

«Երևանյան բեսթսելերը» ներկայացրեց Ռոզա Գրիգորյանը

Վարկանիշային ցուցակի կազմման հարցումներին մասնակցել են «Բուկինիստ» (011-53-74-13), «Հայ գիրք» (56-80-38), «Զանգակ» (011-22-33-66), «Նոյյան տապան» (012- 505-505) գրախանութների և գրատների ցանցերը:

Աստղանիշով նշված գրքերը ցանկ վերադարձածներն են:

Տեղ	Փոփ.	Գիրք		Հրատ.	Քանակ
1	նոր		Նունե և Սավաննա Սարգսյաններ «Կապույտ գետաձիուկի և վարդագույն մկնիկի արկածները»	հեղ.հրատ	70
2	նոր		Հովհաննես Թումանյան «Չարի վերջը»	GSM	45
3	-1		Հովհաննես Թումանյան «Հեքիաթներ»	GSM	41
4	*		Հովհաննես Թումանյան «Հեքիաթներ»	ՄՀՄ	39
5	-4		«Հայկական հեքիաթներ»	GSM	36
6	նոր		Գրիմ Եղբայրներ «Մոխրոտը»	GSM	35
7	-2		Ջ. Ք. Ռոուլինգ «Հարրի Փոթերը և Փիլիսոփայական քարը»	Զանգակ	33
8	-5		8. Հանս Քրիստիան Անդերսեն «Հեքիաթներ»	Արևիկ	32
9	նոր		Շառլ Պերո «Կարմիր գլխարկը»	GSM	30
10	նոր		Հ. Ք. Անդերսեն, «Ձյունե թագուհին»	GSM	29