1 րոպեի ընթերցում
ԵՐԵՎԱՆ, 1 ՆՈՅԵՄԲԵՐԻ, ԱՐՄԵՆՊՐԵՍ: ՀՀ արտաքին գործերի նախարար Զոհրաբ Մնացականյանը մանրամասնեց, թե երկկողմ օրակարգի ինչպիսի հարցեր են քննարկվելու Ռուսաստանի Դաշնության արտաքին գործերի նախարար Սերգեյ Լավրովի հետ՝ Հայաստանի Հանրապետություն այցի ընթացքում:
«Արմենպրես»-ի փոխանցմամբ՝ այս մասին Մնացականյանը նշեց նոյեմբերի 1-ին ՀՀ Ազգային ժողովում լրագրողների հետ զրույցում:
«Սա լինելու է պաշտոնական այց մեր ռազմավարական գործընկեր երկրի ԱԳ նախարարի կողմից: Մենք ունենք բավական դինամիկ շփումներ, բավական ակտիվ երկխոսություն, և մեր օրակարգը չափազանց լայն է, թե երկկողմ հարցերին վերաբերող, թե տարածաշրջանային, թե գլոբալ առումով մեր համագործակցությանը տարբեր հարթակներում: Մենք ունենք տարածաշրջանային տարբեր զարգացումներ, որոնք ուղղակիորեն վերաբերում են մեր օրակարգին, և սա նույնպես երկխոսության թեմա է»,- ասաց Մնացականյանը:
Ռուսական լրատվամիջոցները Սերգեյ Լավրովի՝ Հայաստան այցի ժամկետներ են նշում նոյեմբերի 11-12-ը: