Դեպի ԵԱՏՄ երկրներ ՀՀ-ի արտահանման ցուցանիշները նկատելի աճել են

ԵՐԵՎԱՆ, 30 ՍԵՊՏԵՄԲԵՐԻ, ԱՐՄԵՆՊՐԵՍ: ԵԱՏՄ անդամ պետություններում վերջին տարիներին նկատվում է ոչ միայն տնտեսական աճ, այլև որոշակի կայունության ապահովում:

«Արմենպրես»-ի մամուլի սրահում հրավիրված ասուլիսում տնտեսագետ Մերի Հովսեփյանը նշեց, որ ԵԱՏՄ-ի ՀՆԱ-ի աճը 2018 թվականին կազմել է 2,5 տոկոս աճ: Այս համատեքստում առաջատարը եղել է Հայաստանը, որտեղ ՀՆԱ-ի աճը կազմել է 5,2 տոկոս: Տնտեսագետը նշեց, որ այս միտումները պահպանվում են նաև 2019 թվականին:

«Ինչ վերաբերում է արտաքին առևտրի ծավալներին, ապա 2018 թվականին ԵԱՏՄ-ի այս ցուցանիշը կազմել է 60,2 մլրդ ԱՄՆ դոլար, ինչն աճել է 10,1 տոկոսով: Երբ ուսումնասիրում ենք Հայաստանի արտահանումը, ապա տեսնում ենք, որ 2018 թվականի տվյալներով մեր երկրի արտահանման 29,5 տոկոսը բաժին է ընկել հենց ԵԱՏՄ երկրներին: Այն պարագայում, երբ 2015 թվականին այս ցուցանիշը 13-14 տոկոսով պակաս էր: Ինչը նշանակում է, որ Հայաստանն այս տարիների ընթացքում բավական ակտիվացրել է դեպի ԵԱՏՄ արտահանման ուղղությունը»,-ասաց տնտեսագետը:

Մերի Հովսեփյանն առանձնացրեց այս տարիների ընթացքում արդյունաբերական համագործակցության խորացումը: Չնայած 2018 թվականին Հայաստանում արձանագրվեց հանքարդյունաբերության ցուցանիշի նվազում, այդուհանդերձ, ԵԱՏՄ անդամ երկրների շրջանում մեր երկիրը վերամշակող արդյունաբերության ոլորտում առաջատար է: Այստեղ ունենք 10 տոկոսի աճ: Արդյունաբերական համագործակցության խորացումը կարևորվում է այն հանգամանքով, որ ԵԱՏՄ երկրները ոչ միայն նպատակ ունեն վարել ներմուծման փոխարինման, այլև դեպի երրորդ երկրներ արտահանման խթանման քաղաքականություն:

Տնտեսագետը նշեց, որ այս ընթացքում զգալի աշխատանք է կատարվել ընդհանուր շուկաների ձևավորման ուղղությամբ: Արդեն ավարտին է հասցվել դեղերի, դեղորայքի ընդհանուր շուկայի ձևավորումը, և ընթացքի մեջ են նավթի, նավթամթերքի, էներգետիկ և գազի շուկաների հարցերը: Սահմանվել են վերջնաժամկետներ, և ոչ ուշ, քան 2025 թվականի հունվարի 1-ը այս շուկաները պետք է գործեն: