1 րոպեի ընթերցում
ԵՐԵՎԱՆ, 8 ՀՈՒԼԻՍԻ, ԱՐՄԵՆՊՐԵՍ: Ռուսաստանի Դաշնության նախագահին կից գործարարների իրավունքների պաշտպանության գործերով հանձնակատար Բորիս Տիտովը կարծում է, որ Ալբերտ Խուդոյանի խափանման միջոցը՝ տնային կալանքը փոխարինելը չափազանցված է: «Արմենպրես»-ի հաղորդմամբ, այս մասին տեղեկացնում է ՏԱՍՍ գործակալությունը:
«Դատախազության միջնորդությամբ փոխվել է Ալբերտ Խուդոյանի խափանման միջոցը: Դատարանը գտել է, որ մեղադրյալը կարող է հեռանալ՝ հատելով երկրի սահմանը, չնայած Խուդոյանն անձնագիրը հանձնել է իրավապահներին: Մեր կարծիքով, պատճառաբանությունն այնքան էլ համոզիչ չէ»,- ասել է Տիտովը ՏԱՍՍ-ի թղթակցին:
Մոսկվայի քաղաքային դատարանը չեղարկել էր տնային կալանքի մասին առաջին ատյանի դատարանի որոշումն ու «Optima Development» ընկերության տնօրեն Ալբերտ Խուդոյանին ուղարկել մեկուսարան մինչեւ օգոստոսի 14-ը: Խուդոյանը մեղադրվում է 2 մլրդ ռուբլու չափով խարդախության համար: Գործարարը մեղքը չի ընդունում: