368.59
Գյուղնախարարությունն այս տարի ծիրանի միջին բերք է ակնկալում
1 րոպեի ընթերցում
ԵՐԵՎԱՆ, 20 ՄԱՅԻՍԻ, ԱՐՄԵՆՊՐԵՍ: ՀՀ գյուղատնտեսության նախարարի տեղակալ Գառնիկ Պետրոսյանը համոզված է, որ «այս տարի ծիրան ոչ միայն ուտելու ենք, այլև արտահանելու»: «Արմենպրես»-ի հաղորդմամբ՝ լրագրողների հետ հանդիպմանը Պետրոսյանն ասաց, որ նախնական կանխատեսումներով՝ ծիրանի միջին բերք է ակնկալվում, ապա համոզմունք հատնեց, որ ծիրանի գինն այս տարի ևս նախորդ տարիներից էականորեն չի տարբերվի, իսկ հասունացած, լավագույն պտուղները բաժին կընկնեն տեղական սպառողին:
«Երբ բերքը քիչ է, դա նպաստում է, որ ձևավորվեն ավելի խոշոր պտուղներ, լավ ապրանքային տեսքով, որոնց հիմնական մասը պիտանի են դառնում արտահանումների համար»,-ասաց նա:
Գյուղատնտեսության նախարարի տեղակալը հորդորեց ծիրանի մշակությամբ զբաղվող այգեգործներին լրացուցիչ միջոցառումներ իրականացնել ծակոտկեն բծավորության դեմ պայքարի կազմակերպման համար: «Վտանգ կա և հիվանդության բուռն զարգացման դեպքում, մենք կկորցնենք բերքի ապրանքային տեսքը և բնականաբար նման պտուղները արտահանման համար պիտանի չեն կարող լինել»,-հավելեց Պետրոսյանը:
Բաժանորդագրվեք մեր ալիքին Telegram-ում