365.87
Ստեղծվում է «Հայաստանի պետական հետաքրքրությունների ֆոնդ». այն կզբաղվի 10 մլն դոլարը գերազանցող ներդրումների աջակցմամբ
2 րոպեի ընթերցում
ԵՐԵՎԱՆ, 18 ԱՊՐԻԼԻ, ԱՐՄԵՆՊՐԵՍ: ՀՀ կառավարության որոշմամբ ստեղծվում է «Հայաստանի պետական հետաքրքրությունների ֆոնդ» փակ բաժնետիրական ընկերություն: Տնտեսական զարգացման և ներդրումների նախարար Տիգրան Խաչատրյանը նշեց, որ հիմնադրամի նպատակն օտարերկրյա ներդրումների իրականացմանն աջակցելն է: «Այս կառույցը կզբաղվի, հավանաբար, 10 միլիոն դոլարը գերազանցող ներդրումների աջակցմամբ։ Որակապես նոր քայլ ենք կատարում օտարերկրյա ներդրումներ ներգրավելու ուղղությամբ: Այս հիմնադրամը պետք է ուղեկցի նման նշանակալի ներդրումների իրականացումը:
Ֆոնդը իր նախաձեռնությամբ պետք է քննարկման առարկա դարձնի այնպիսի ծրագրեր, որոնք կարող են իրենց շուրջ հավաքել տարբեր մասնավոր եւ տարբեր ներդրումային ֆոնդերի հետաքրքրությունը առաջացնող ծրագրեր եւ նպաստի դրանց առաջխաղացմանը»,- «Արմենպրես»-ի փոխանցմամբ, ասաց նախարարը:
«Հայաստանի պետական հետաքրքրությունների ֆոնդ» ընկերություն ստեղծելու նպատակը ՀՀ-ի տնտեսության զարգացման աջակցումն է` ներդրումների, այդ թվում օտարերկրյա ներդրումների ներգրավման միջոցով:
Ընկերությունը ՀՀ-ում պոտենցիալ խոշոր ներդրողներին լիարժեք եւ համալիր խորհրդատվության եւ աջակցության միջոցով կնպաստի ՀՀ-ում ներդրումային հոսքերի ավելացմանը, ոլորտային ծրագրեր նախաձեռնելու եւ իրագործելու միջոցով Հայաստանի տնտեսության ներուժի զարգացմանը եւ գիտատեխնիկական զարգացման արդյունքների ներդրմանը տնտեսության տարբեր ոլորտներում, ՀՀ-ում գործարար միջավայրի բարելավման եւ գործարար հատվածի համար գործունեության բարենպաստ պայմանների ստեղծման եւ կատարելագործման գործընթացին:
Բաժանորդագրվեք մեր ալիքին Telegram-ում