368.59
Ընթացքի մեջ է գյուղատնտեսական ոլորտի 11 պետական օժանդակության ծրագիր
2 րոպեի ընթերցում
ԵՐԵՎԱՆ, 15 ԱՊՐԻԼԻ, ԱՐՄԵՆՊՐԵՍ: Հայաստանի Հանրապետությունում ընթացքի մեջ գտնվող գյուղատնտեսական ոլորտի 11 պետական օժանդակության ծրագրերն էլ իրականացվում են երկու հիմնական ուղղությամբ՝ վարկային ռեսուրսների սուբսիդավորում և ուղիղ ֆինանսավորում:
«Արմենպրես»-ի հաղորդմամբ՝ լրագրողների հետ զրույցում այս մասին ասաց ՀՀ գյուղատնտեսության նախարարի պարտականությունները կատարող Գեղամ Գևորգյանը:
«Այս պահին գյուղատնտեսության մեջ չկա այնպիսի ճյուղ, որտեղ պետությունը ֆինանսներ չի տրամադրել: Սա վերաբերում է թե' անասնապահությանը, թե' բուսաբուծությանը: Այսինքն` բոլոր ճյուղերով մենք ֆինանսական ռեսուրսներ տրամադրել ենք», - ընդգծեց Գևորգյանը:
Նախարարի պարտականությունները կատարողը հավելեց, որ ֆինանսական շուկաների և կառույցների բիզնես արդյունավետությունը չնվազեցնելու համար մշակվում են նաև այլ գործիքներ, որոնք ուղղված են լինելու գյուղացիական տնտեսություններին աջակցելուն:
«Հուսով եմ, որ աստիճանաբար ուղիղ ֆինանսավորմամբ ծրագրերը կգերակշռեն սուբսիդավորման ծրագրերին»,- ասաց Գեղամ Գևորգյանը:
Նրա պնդմամբ՝ պետական օժանդակության ծրագրերի մասին տեղեկությունները գյուղացիների համար ավելի հասանելի դարձնելու նպատակով պատրաստվել են և մարզերին տրամադրվել հատուկ տեղեկատվական թերթիկներ:
Բաժանորդագրվեք մեր ալիքին Telegram-ում