3 րոպեի ընթերցում
ԵՐԵՎԱՆ, 27 ԴԵԿՏԵՄԲԵՐԻ, ԱՐՄԵՆՊՐԵՍ: Այսօր #ԿինոՇաբթի է: «Արմենպրես» լրատվական գործակալությունը շարունակում է ամեն հինգշաբթի ընթերցողին պատմել տվյալ շաբաթվա կինոպրեմիերաների մասին: Դեկտեմբերի 27-ից երևանյան կինոթատրոններում հնարավոր կլինի դիտել 3 նոր ֆիլմ:
«Գրինչ»
Բոլորը նախապատրաստվում են տարեմուտի հսկայական միջոցառմանն ու անընդհատ աղմկում են։ Գրինչն էլ իր մութ քարանձավում ցանկանում է հեռու մնալ բոլորից։ Եվ այդ նախատոնական մթնոլորտում նրան բոլորը խանգարում են։ Ինչպե՞ս չզայրանաս ու կատաղությունից չկանաչես։ Գրինչը որոշում է գողանալ Սուրբ ծնունդը։
Ռեժիսոր՝ Յարոու Չեյնի, Սքոթ Մոուժեր, դերերում՝ Բենեդիկտ Քամբերբաչ, Քեմերոն Սիլի, Ֆարել Ուիլյամս և այլք:
«Վերջին տոնածառերը»
«Վերջին Տոնածառերը» բաղկացած է 5 Ամանորյա պատմություններից: Պատմություններից մեկի հերոսը կօգնի իր խորթ հորն առաջարկություն անել սիրելիին: Մյուսի հերոսները՝ երկու ընկերները, ստիպված կլինեն բաժանվել, քանի որ նրանցից մեկը տեղափոխվում է Յակուտսկ: Մեկ այլ պատմության հերոսներն ամբողջ քաղաքով կփնտրեն գեղեցիկ ժպիտ ունեցող մի աղջկա:
Ֆիլմի հերոսներն այս պատմություններով կփորձեն մի քիչ բարություն, հոգատարություն ու տոնական տրամադրություն հաղորդել հանդիսատեսին։
Ռեժիսոր՝ Տիմուր Բեկմամբետով, Եգոր Բարանով, Աննա Պարմաս, Ալեքսանդր Կոտտ, դերերում՝ Իվան Ուրգանտ, Սերգեյ Սվետլակով, Դմիտրի Նագիև և այլք:
«Երեք դյուցազունները և գահի ժառանգորդուհին»
Կիևի իշխանը որոշում է գահը փոխանցել ժառանգորդին, սակայն ո՞վ կարող է դառնալ գահաժառանգ: Իշխանի որևէ ազգակա՞նը, ընտանիքի ընկե՞րը, թե՞ ինչ-որ արքայադուստրը: Կարճ ժամանակ երկմտելուց հետո իշխանն այդ դերի համար ընտրում է իր զարմուհուն՝ Զաբավային: Երեք դյուցազուններն ուղևորվում են հեռավոր երկրներ՝ գահի ժառանգորդուհուն հայրենիք բերելու համար:
Ռեժիսոր՝ Կոնստանտին Բրոնզիտ, դերերում՝ Միխայիլ Չերնյակ, Սերգեյ Մակովեցկիյ, Վալերի Սոլովյով և այլք:
Տեղեկացնենք, որ #ԿինոՇաբթի նախագիծը պատրաստվել է «Մոսկվա», «Սինեմա Սթար», «Կինոպարկ» կինոթատրոնների տրամադրած տվյալներով:
Նախագծի հեղինակ՝ Ռոզա Գրիգորյան