368.54
Հայկ Սարգսյանի համոզմամբ, երկրի տնտեսական աճը թաքնված է սահմանդրականության բարձր մակարդակի մեջ
2 րոպեի ընթերցում
ԵՐԵՎԱՆ, 23 ՆՈՅԵՄԲԵՐԻ, ԱՐՄԵՆՊՐԵՍ: Առաջիկա տարիներին Հայաստանի տնտեսության շեշտակի վերելքն իրատեսական է: Երևանում անցկացվող «Հայաստանի տնտեսության զարգացման արդի հիմնախնդիրները և ռազմավարական ուղղությունները» թեմայով խորհրդաժողովի ժամանակ այս մասին նշեց ԵՊՀ տնտեսագիտության և կառավարման ֆակուլտետի դեկան, տնտեսագիտության դոկտոր, պրոֆեսոր Հայկ Սարգսյանը՝ ներկայացնելով «Իշխանության գերխնդիրը սահմանադրականության մակարդակի բարձրացումն է» թեմայով զեկույցը:
«Վերելքի հասանելիությունը մեծապես կապված է լինելու վաղվա օրվա նկատմամբ վստահության ու արդյունավետ տնտեսավարման կարողունակության հետ: Երբ խոսում ենք սահմանադրականության մասին, ասեմ, որ այդ ճանապարհը հարթ չէ: Ունենալ գրված Սահմանադրություն՝ դեռ չի նշանակում ունենալ այդ նորմերի բարձր իրացվելիության իրավիճակ: Բոլոր նորմերը, որոնք ամրագրված են Սահմանադրության մեջ, պետք է գերակա լինեն, իսկ այդ ուղղությամբ լուրջ անելիքներ ունենք»,- «Արմենպրես»-ի հաղորդմամբ, ասաց բանախոսը:
Նա նշեց, որ անցումային 29 երկրների շարքում սահմանադրականության մակարդակով Հայաստանը գտնվում է միջին տեղում՝ Ալբանիայի, Բոսնիա և Հերցեգովինայի հետ: Ցածր մակարդակով բնութագրվում են Բելառուսը, Ղազախստանը, Տաջիկստանը, Ռուսաստանը: Բարձր մակարդակ ունեցողներն են Մերձբալթյան հանրապետությունները:
«Երբ փորձում ենք զատել ցուցիչները, վարկանիշային գնահատականները տեսնում ենք, որ դրանք երկու խմբով են ներկայանում՝ ժողովրդավարություն, ինստիտուցիոնալ զարգացում: Մենք կարող ենք իսկապես ներկայիս ժողովրդավարությանը զուգահեռ գործադրել ինստիտուտները, ընդ որում, ամենատարբեր բնույթի՝ քաղաքացիական հասարակություն, անկախ մեդիա, կառավարության գործունեության արդյունավետություն, իրավունքի գերակայություն և այլն: Այս իմաստով իմ արձանագրումը հետևյալն է. սահմանդրականության բարձր ցուցիչները երաշխիք են առաջընթացի համար: Տնտեսական աճը թաքնված է սահմանդրականության բարձր մակարդակի մեջ»,-ասաց Հայկ Սարգսյանը:
Բաժանորդագրվեք մեր ալիքին Telegram-ում