#ԿինոՇաբթի. «Մարդը լուսնի վրա»-ը և ևս 4 նոր ֆիլմեր կհայտնվեն հայկական կինովարձույթում
3 րոպեի ընթերցում
ԵՐԵՎԱՆ, 11 ՀՈԿՏԵՄԲԵՐԻ, ԱՐՄԵՆՊՐԵՍ: Այսօր #ԿինոՇաբթի է: «Արմենպրես» լրատվական գործակալությունը շարունակում է ամեն հինգշաբթի ընթերցողին պատմել տվյալ շաբաթվա կինոպրեմիերաների մասին: Հոկտեմբերի 11-ից երևանյան կինոթատրոններում հնարավոր կլինի դիտել 5 նոր ֆիլմեր:
«Մարդը լուսնի վրա»
Ճակատագիրը սիրում է խիզախներին, իսկ Նիլ Արմստրոնգը միանշանակ նրանց թվին է պատկանում։ Ամբողջ աշխարհը գիտի նրա անունը, սակայն շատ քչերին է հայտնի, թե ինչ գնով է տիեզերագնացը կատարել այդ փոքր քայլը, որը դարձավ մարդկության ամենամեծ վերելքը։
Ռեժիսոր՝ Դեմյեն Շազել, դերերում՝ Ռայան Գոսլինգ, Քլեր Ֆոյ, Պաբլո Շրայբեր և այլք:
«Ոչ մի լավ բան «Էլ Ռոյալ» հյուրանոցում»
1969 թվական։ Մի խումբ երիտասարդներ գիշերելու համար գալիս են ժամանակին հայտնի «Էլ Ռոյալ» հյուրանոց, որը գտնվում է Նևադա և Կալիֆորնիա նահանգների սահմանին։ Հյուրանոցում հավաքվել են անբարեհամբույր քահանան, երգչուհի Դարլինը, փոշեկուլների վաճառողը և հարավից տարօրինակ աղջիկ։ Նրանց հետ գիշերը հյուրանոցում մնալու է նաև երիտասարդ դռնապանը։ Նրանցից յուրաքանչյուրն ինչ-որ բան է թաքցնում։
Ռեժիսոր՝ Դրյու Հոդարթ, դերերում՝ Քրիս Հեմսվորթ, Ջեֆ Բրիջես, Դակոտա Ջոնսոն և այլք:
«Պատրիկ»
Սառան ուսուցչուհի է և ոչնչով չի տարբերվում իր տարիքի մյուս կանանցից. նույն խնդիրները, նույն անհաջողությունները կյանքում։ Սառայի մոտ հիմա ուղղակի այնպիսի քաոս է, որ պատկերացնելն անգամ դժվար է։ Նրան բացի մենությունից ոչինչ անհրաժեշտ չէ, և վերջին բանը, որ պետք է նրան, մեկ ուրիշին խնամելն է։ Բայց Սառայի տատիկը նրան նվիրում է իր կամակոր և չարաճճի մոպսին՝ Պատրիկին, որն անընդհատ անհարմար դրության մեջ է դնում Սառային՝ փչացնելով նրա կյանքը։
Ռեժիսոր՝ Մենդի Ֆլեթչեր, դերերում՝ Բիթի Էդմոնդսոն, Էդ Սքրեյն, Էմիլի Ատակ և այլք:
«Էքստազ»
Ժամանակակից պարերի դպրոցի ավարտական դասարանների աշակերտները որոշում են հրաժեշտի երեկո կազմակերպել: Երաժշտության առեղծվածային ռիթմը նրանց պարուրում է էյֆորիայով, որին անհնար է դիմադրել: Աշակերտների մի մասի համար գիշերը կվերածվի ծանր փորձության: Մյուսներն էլ կճաշակեն իսկական էքստազը:
Ռեժիսոր՝ Գասպար Նոե, դերերում՝ Սոֆիա Բուտելա, Սմայլ Քիդի, Ժիզել Պալմեր և այլք:
«Առանց ինձ»
Երկու աղջիկներ, ովքեր սիրում էին միևնույն տղամարդուն, նրա մահից հետո նամակներ են ստանում, որոնց հեղինակը միայն այդ տղամարդը կարող է լինել: Հրաշքի հույսով երկու աղջիկներն ստիպված են լինելու ճամփորդել՝ բացահայտելու հաղորդագրությունների հետևում եղած առեղծվածը:
Ռեժիսոր՝ Կիրիլ Պլետնև, դերերում՝ Կիրիլ Պլետնև, Պոլինա Մաքսիմովա, Լյուբով Ակսենովա և այլք:
Տեղեկացնենք, որ #ԿինոՇաբթի նախագիծը պատրաստվել է «Մոսկվա», «Սինեմա Սթար», «Կինոպարկ» կինոթատրոնների տրամադրած տվյալներով:
Նախագծի հեղինակ՝ Ռոզա Գրիգորյան