Հայաստանի և Հունաստանի ԱԳ նախարարները քննարկել են հայ-հունական հարուստ օրակարգի բազմաթիվ հարցեր
2 րոպեի ընթերցում
ԵՐԵՎԱՆ, 28 ՍԵՊՏԵՄԲԵՐԻ, ԱՐՄԵՆՊՐԵՍ: Սեպտեմբերի 27-ին Նյու Յորքում ընթացող ՄԱԿ-ի Գլխավոր ասամբլեայի 73-րդ նստաշրջանի շրջանակներում Հայաստանի արտաքին գործերի նախարար Զոհրաբ Մնացականյանը հանդիպել է իր հույն գործընկերոջ՝ Նիկոս Կոձիասի հետ:
Ինչպես «Արմենպրես»-ին տեղեկացրին ՀՀ ԱԳՆ լրատվության և հանրային դիվանագիտության վարչությունից, զրուցակիցները հանգամանալից քննարկել են հայ-հունական հարուստ օրակարգի բազմաթիվ հարցեր, ուրվագծել են փոխշահավետ համագործակցության հետագա զարգացմանը և խորացմանն ուղղված համատեղ քայլերը: Այս համատեքստում կարևորվել է բարձրաստիճան փոխայցելությունների հաճախակի բնույթը, որն իրապես արտացոլում է երկու բարեկամ պետությունների միջև հաստատված քաղաքական երկխոսության բարձր մակարդակը: Երկուստեք ընդգծվել է Հունաստանում և Հայաստանում հայկական և հունական համայնքների ունեցած հատուկ դերակատարությունը երկու երկրների բարեկամության առավել խորացման գործում:
Կողմերը պատրաստակամություն են հայտնել շարունակել բազմակողմ հարթակներում փոխգործակցությունը և դիրքորոշումների համադրումը:
Նախարար Մնացականյանը իր գործընկերոջը ներկայացրել է Հայաստանում տեղի ունեցած վերջին ներքաղաքական զարգացումները և ժողովրդի կողմից տրված լայն մանդատի հիման վրա կառավարության կողմից իրականացվող բարեփոխումները:
Հայաստանի և Հունաստանի արտգործնախարարներն անդրադարձ են կատարել միջազգային ու տարածաշրջանային մի շարք հրատապ հարցերի: