2 րոպեի ընթերցում
ԵՐԵՎԱՆ, 23 ՍԵՊՏԵՄԲԵՐԻ, ԱՐՄԵՆՊՐԵՍ: Երևանի ավագանու ընտրություններում «Լույս» դաշինքի քաղաքապետի թեկնածու Արտակ Զեյնալյանն այս ընտրությունը նախորդներից առանձնացրեց նրանով, որ չկա գաղջ մթնոլորտ:
«Արմենպրես»-ի հաղորդմամբ՝ նման տեսակետ հայտնեց քաղաքապետի թեկնածուն 4/30 ընտրատեղամասում իր քվեարկությունը կատարելուց հետո լրագրողների հետ զրույցում:
«Քվեարկել եմ արդյունավետ և արդար կառավարման օգտին, հանուն Երևանի հավերժության: Մենք մեր քարոզարշավն իրականացրել ենք դրական լույսի ներքո: Հայաստանում պետք է չլինեն մերժվածներ, որևէ մեկին թշնամի չենք դիտարկում: Պետք է լինի քննարկում, տեսակետների բախում, բայց ոչ հակամարտություն, ինչպես առաջ էր»,-նշեց Զեյնալյանը:
Նրա կարծիքով՝ այս քարոզարշավը նախորդներից տարբերվեց նրանով, որ չկար նախկինում տիրող մթնոլորտը՝ ընտրակաշառքի, վարչական լծակների և վարչական ռեսուրսի օգտագործմամբ: «Այս ընտրություններում բացակայում է այն գաղջ մթնոլորտը, որը նախկինում կար»,-նշեց Զեյնալյանը:
Քաղաքապետի թեկնածուի կարծիքով՝ վաղվանից ամեն ինչ կսկսեն մաքուր էջից, թեև կողմնակից է առհասարակ չմրոտելուն:
Հարցին՝ թե «Իմ քայլը» դաշինքի հետ պատրաստվո՞ւմ են ավագանիում կոալիցիա ձևավորել, նշեց՝ քվեարկությունը կավարտվի, կկողմնորոշվեն: Նա նաև չբացառեց, որ ավագանու ընտրությունները կարող են կողմնորոշիչ դառնալ առաջիկա խորհրդարանական ընտրությունների համար: