2 րոպեի ընթերցում
ԵՐԵՎԱՆ, 13 ՍԵՊՏԵՄԲԵՐԻ, ԱՐՄԵՆՊՐԵՍ: Ռեֆորմիստների կուսակցությունը Երևանի ավագանու ընտրություններին մասնակցում է հաղթելու համար:
«Արմենպրես»-ի հաղորդմամբ` այս մասին սեպտեմբերի 13-ին լրագրողների հետ հանդիպմանն ասաց կուսակցության նախագահ Վահան Բաբայանը:
Նրա խոսքով` կուսակցությունը նորաստեղծ է, և Երևանի ավագանու ընտրություններին մասնակցելն իրենց առաջին լուրջ փորձն է, ապա հավելեց, որ արդեն բավականին համակիրներ ունեն:
«Մեր նպատակը ոչ միայն անցողիկ շեմն անցնելն է, այլև մեր մայրաքաղաքի բարգավաճմանը նպաստելը: Մենք չենք բացառում որևէ մեկի հետ մեր համագործակցությունը»,-նշեց Բաբայանը:
Ռեֆորմիստների կուսակցության նախագահն ընդգծեց, որ իրենց կուսակցությունը ծավալուն ծրագրեր չի հրապարակել: Քաղաքապետի իրենց թեկնածու Արտակ Ավետյանը ներկայացրել է ծրագրային տասը կարևոր կետեր, որոնցից ամենակարևորը Երևանի կանաչապատումն է:
«Մեզ համար կարևոր առաջնահերթություններ են նաև կենդանիների պաշտպանությունը, վերգետնյա և ստորգետնյա կայանատեղիների ստեղծումը, խելացի լուսացույցների, արևային էներգիայի կիրառումը»,-հավելեց Բաբայանը՝ վստահեցնելով, որ Երևանը չպետք է կորցնի իր երբեմնի դիմագիծը:
Վահան Բաբայանը շեշտեց` իրենց թեկնածու Արտակ Ավետյանը միակն է թեկնածուների մեջ, որ անկուսակցական է, և միակն է, որ քաղաքական պրոցեսներին չի մասնակցել:
Երևանի ավագանու ընտրությունները կանցկացվեն սեպտեմբերի 23-ին: Ընտրություններին մասնակցելու է 12 կուսակցություն: