368.59
ՀՀ կառավարությունն ակտիվ աշխատում է օտարերկրյա ներդրողների համար բարենպաստ պայմաններ ստեղծելու ուղղությամբ
2 րոպեի ընթերցում
ԵՐԵՎԱՆ, 3 ՍԵՊՏԵՄԲԵՐԻ, ԱՐՄԵՆՊՐԵՍ: Հայաստանի կառավարությունը քայլեր է ձեռնարկում օտարերկրյա ներդրողների համար բարենպաստ պայմաններ ստեղծելու ուղղությամբ:
Սեպտեմբերի 3-ին լրագրողների հետ հանդիպմանը ՀՀ տնտեսական զարգացման և ներդրումների նախարար Արծվիկ Մինասյանը հայտնեց, որ կառավարությունում վերջնական քննարկման փուլում է «Պետություն-մասնավոր գործընկերության մասին» օրենքի նախագիծը, որի հիմնական նպատակը օտարերկրյա ներդրողների համար լավ պայմաններ ստեղծելն է:
«Նախագծի գլխավոր նպատակը հենց օտարերկրյա ներդրողների համար լավ պայմաններ ստեղծելն է՝ երաշխավորված, տեսանելի, կանխատեսելի պետական մարմինների վարքագծով: Սա ներքին ներդրողներին նույնպես վերաբերվում է»,- «Արմենպրես»-ի հաղորդմամբ՝ ընդգծեց նախարարը:
Արծվիկ Մինասյանը շեշտեց, որ պետություն-մասնավոր հարաբերակցությունը պետք է հիմնված լինի հստակ խաղի կանոնների վրա: «Չի կարող այնպես լինել, որ որևէ պետական մարմին մի որոշում կայացնի, որի արդյունքում խաթարվի որևէ ներդրումային ծրագիր: Իսկ ներդրումային ծրագրերին պետք է նախորդեն բազմաշերտ ուսումնասիրությունները, բոլոր ռիսկերի գնահատումները, որի հիման վրա պետք է դրվի ներդրումների երաշխավորության համակարգը»,- մանրամասնեց Մինասյանը:
Նախարարը նաև հավելեց, որ կառավարությունն աշխատում է ներդրումային նոր օրենք ունենալու վրա, որը պետք է ներկայում գործող օտարերկրյա ներդրումների պաշտպանության համակարգը լրացնի նոր գործիքակազմով, ինչն ավելի մեծ վստահություն կտա ներդրողներին ներդրումներ կատարել և ապահովագրել իրենց ներդրումները:
Բաժանորդագրվեք մեր ալիքին Telegram-ում