3 րոպեի ընթերցում
ԵՐԵՎԱՆ, 28 ՀՈՒՆԻՍԻ, ԱՐՄԵՆՊՐԵՍ: Հինգշաբթին #ԿինոՇաբթի է: «Արմենպրես» լրատվական գործակալությունը շարունակում է ամեն հինգշաբթի ընթերցողին պատմել շաբաթվա կինոպրեմիերաների մասին: Հունիսի 28-ից երևանյան կինոթատրոններում հնարավոր կլինի դիտել 4 նոր ֆիլմ:
«Տարերքի գրկում»
Նրանց անսպասելի հանդիպումը Տահիտիում դարձավ մեծ սիրո սկիզբ։ Երիտասարդները շքեղ զբոսանավով ուղևորվում են Խաղաղ օվկիանոսով ճանապարհորդության։ Հանկարծակի նավին ընդառաջ է գալիս պատմության մեջ ամենահզոր փոթորիկըՆրանց կյանքն ու ապագան հայտնվում են տարերքի գրկում։
Ռեժիսոր՝ Բալթազար Կորմակուր, դերերում՝ Շեյլին Վուդլի, Սեմ Քլեֆլին և այլք:
«Մարդասպանը 2։ Ընդդեմ բոլորի»
ԱՄՆ-Մեքսիկա սահմանի վրա իրադրությունը թեժանում է, երբ նարկոկարտելները սկսում են ԱՄՆ տեղափոխել ահաբեկիչների։ Նրանց դեմ պայքարելու համար դաշնային գործակալ Մեթ Գրեյվերը ստիպված է լինում նորից միավորվել ոչ այդքան վստահելի գործընկերոջ՝ Ալեխանդրոյի հետ։ Կհաջողվի՞ արդյոք նրանց հաղթահարել բոլոր դժվարությունները:
Ռեժիսոր՝ Ստեֆանո Սոլիմա, դերերում՝ Բենիսիո դել Տորո, Ջոշ Բրոլին, Իզաբելա Մոներ և այլք:
«Քո հերթն է»
Ամեն տարի մեկ ամսվա ընթացքում հինգ ընկերներ մասնակցում են «Բռնոցի» խաղի ավելի ժամանակակից և դաժան տարբերակին։ Նրանք միասին խաղում են այդ խաղն առաջին դասարանից՝ վտանգելով սեփական կյանքը, աշխատանքն ու հարաբերությունները միայն այն պատճառով, որ հաղթահարեն մրցակցին և բղավեն հաղթական «Քո հերթն է» նախադասությունը։ Այս տարի խաղը համընկնում է միակ անհաղթ խաղացողի հարսանիքի հետ...
Ռեժիսոր՝ Ջեֆ Թոմսիկ, դերերում՝ Ջերեմի Ռեններ, Էդ Հելմս, Անաբել Ուոլիս և այլք:
«Գրքի ակումբ»
Ինտելեկտուալ կանանց ձեռքում պատահաբար հայտնվում է «Մոխրագույնի հիսուն երանգները» բեսթսելերը: Այդ պահից կալիֆորնիաբնակ կանանց կյանքն ամբողջովին փոխվում է:
Ռեժիսոր՝ Բիլ Հոլդերման, դերերում՝ Ջեյն Ֆոնդա, Դայան Քիթոն, Քենդիս Բերգեն և այլք:
Տեղեկացնենք, որ #ԿինոՇաբթի նախագիծը պատրաստվել է «Մոսկվա», «Սինեմա Սթար», «Կինոպարկ» կինոթատրոնների տրամադրած տվյալներով:
Նախագծի հեղինակ՝ Ռոզա Գրիգորյան