Մեկնարկել են ոստիկանության 100-ամյակի միջոցառումները, ոստիկանապետը հարգանքի տուրք է մատուցել Արամ Մանուկյանի և Իրավակարգի զինվորի հիշատակին
3 րոպեի ընթերցում
ԵՐԵՎԱՆ, 6 ԱՊՐԻԼԻ, ԱՐՄԵՆՊՐԵՍ: Արամ Մանուկյանի և Իրավակարգի զինվորի հուշարձանների մոտ հարգանքի տուրք մատուցելու արարողություններով են ապրիլի 6-ին մեկնարկել Հայաստանի ոստիկանության 100-ամյակի միջոցառումները։ Այս մասին «Արմենպրես»-ը տեղեկացավ ՀՀ ոստիկանության պաշտոնական կայքից։
Հաղորդագրության մեջ նշված է. «2018 թվականը հոբելյանական է Հայաստանի Հանրապետության համար, իսկ ոստիկանության համար` կրկնակի հոբելյանական. իրավապահ համակարգը նշում է հիմնադրման հարյուրերորդ տարեդարձը` հպարտ գիտակցությամբ, որ այն եզակի պետականաստեղծ կառույցներից է, որը հարյուր տարի անընդմեջ նվիրումով և անմնացորդ ծառայում է օրենքին ու ժողովրդին:
Հոբելյանական տարվա տոնական հանդիսությունները մեկնարկեցին ապրիլի 6-ին:
ՀՀ ոստիկանության պետ, ոստիկանության գեներալ-գնդապետ Վլադիմիր Գասպարյանի գլխավորությամբ` ոստիկանության կոլեգիայի անդամները, բարձրաստիճան սպաները, վետերաններն ու հյուրերը ծաղկեպսակներ ու ծաղիկներ խոնարհեցին Արամ Մանուկյանի և Իրավակարգի զինվորի հուշարձաններին` հարգանքի տուրք մատուցելով ոստիկանության կառույցը հիմնած ու ղեկավարած գործիչներին և ծառայողական պարտականությունները կատարելիս իրենց կյանքը չխնայած գործընկերներին:
Տոնական օրը շարունակվեց հանդիսավոր նիստով:
Ոստիկանության քայլերգի ներքո դահլիճ բերվեցին Հայաստանի Հանրապետության ու ոստիկանության դրոշները:
Հնչեց Հայաստանի Հանրապետության պետական օրհներգը:
Ոստիկանության անձնակազմին, վետերաններին, ոստիկանական ընտանիքներին հոբելյանի առթիվ շնորհավորանքի ջերմ խոսք հղեց Հայաստանի Հանրապետության ոստիկանության պետ Վլադիմիր Գասպարյանը:
Այնուհետև հրապարակվեցին Հայաստանի Հանրապետության նախագահ Սերժ Սարգսյանի հրամանագրերը ոստիկանության մի խումբ ծառայողների պետական պարգևների արժանացնելու մասին:
Պարգևները հանձնեց Հայաստանի Հանրապետության ոստիկանության պետ, ոստիկանության գեներալ-գնդապետ Վլադիմիր Գասպարյանը:
Հայաստանի Հանրապետության մի շարք ծառայողներ պարգևատրվեցին Ազգային ժողովի նախագահ Արա Բաբլոյանի կարգադրությամբ և վարչապետ Կարեն Կարապետյանի որոշումով:
Հայաստանի Հանրապետության ոստիկանության 100-րդ տարեդարձի կապակցությամբ ոստիկանության տասնյակ ծառայողներ պարգևատրվել են ՀՀ պաշտպանության նախարարի, Ազգային անվտանգության ծառայության տնօրենի, Գլխավոր դատախազի, Արդարադատության նախարարի, Արտակարգ իրավիճակների նախարարի, Հատուկ քննչական ծառայության պետի, Քննչական կոմիտեի նախագահի և Արցախի Հանրապետության ոստիկանության պետի հրամաններով: Իսկ ՀՀ ոստիկանության պետ Վլադիմիր Գասպարյանի հրամաններով խրախուսանքների են արժանացել ոստիկանության 1235 ծառայողներ ու 110 վետերաններ»: